Mınıstr Birjan Nurymbetov aqtóbelikterdi jeke qabyldady

AQTÓBE. QazAqparat – Jumys saparymen Aqtóbege kelgen Eńbek jáne halyqty áleýmettik qorǵaý mınıstri Birjan Nurymbetov «Nur Otan» partııasynyń oblystyq fılıalynda azamattardy jeke qabyldady, dep habarlaıdy QazAqparat tilshisi vedomstvonyń baspasóz qyzmetine silteme jasap.

Aqtóbelikter mınıstrge zańsyz taǵaıyndalǵan ataýly áleýmettik kómekti qaıtarý, boryshtyq júktemeni azaıtý jáne múgedektigi bar azamattardy jumysqa ornalastyrý týraly suraqtar qoıdy.

«Jańa tásilder úsh baǵyt boıynsha memlekettik kómek kórsetýdi qarastyrady. Birinshisi - respýblıkalyq bıýdjet arqyly kópbalaly otbasylardy qoldaý. Bul barlyq kópbalaly otbasylarǵa, tabysyna qaramastan tólenedi. Ekinshisi - az qamtylǵan otbasylarǵa ataýly áleýmettik kómek. Ony taǵaıyndaýdyń shekti ólshemi kúnkóris deńgeıiniń 70% deńgeıinde qalady. AÁK alatyn otbasynyń eńbekke qabiletti múshesi usynylǵan jumystan jáne jumysqa ornalasýǵa yqpal etý sharalarynan bas tartsa, kómek berý toqtatylady. Úshinshisi - áleýmettik jaǵdaıy tómen otbasylardaǵy balalarǵa kepildendirilgen áleýmettik paket. 1 jastan 6 jasqa deıingi balalar azyq-túlik jıyntyǵymen jáne gıgıenalyq zattarmen qamtamasyz etiledi. 6 jastan 18 jasqa deıingi balalar mektepterde ystyq tamaqpen, oqý quraldarymen, mektep kıimderimen qamtamasyz etiledi. Sonymen qatar mektepke barý shyǵyndary óteledi. Medıtsınalyq kómek, onyń ishinde stomatologııalyq kómek 18 jasqa deıingi balalarǵa tegin bolady», – dep túsindirdi Birjan Nurymbetov.

Keıin mınıstr neıropsıhıatrııalyq aýrýǵa shaldyqqan 18 jasqa deıingi balalarǵa arnalǵan «Jaına» ońaltý ortalyǵyna bardy.

«Múgedekterdiń qoǵamǵa tolyq aralasýy úshin ońaltý qyzmetteri óte mańyzdy. Qazaqstanda osy baǵytta jumys isteıtin túrli uıymdar kóbeıip keledi. Keshe ǵana biz «Qazaqstannyń úzdik áleýmettik jobalary» VII respýblıkalyq baıqaýynyń qorytyndysyn shyǵardyq. Osy jyly kóptegen jobalar fınalǵa shyqty. Endi joba aıasynda múgedekterge naqty kómek kórsetildi. Múgedektigi bar adamdar úshin áleýmettik ınfraqurylym obektilerine kedergisiz qol jetkizýdi qamtamasyz etý, jumysqa ornalastyrý, olardyń quqyqtaryn iske asyrý jáne qorǵaý bizdiń mınıstrlik qyzmetiniń basym baǵyttarynyń biri bolyp tabylady», – dep atap ótti vedomstvo basshysy.

Eske salsaq, Aqtóbe oblysyna QR Premer-Mınıstriniń orynbasary Berdibek Saparbaev bastaǵan úkimettik jumys toby keldi. Onyń quramynda Eńbek jáne halyqty áleýmettik qorǵaý mınıstri Birjan Nurymbetov pen Bilim jáne ǵylym mınıstri Ashat Aımaǵambetov bar.