Mınıstr Birtanov teledebattyń kúnin belgiledi

ASTANA. QazAqparat - Buǵan deıin ekonomıst Raxym Oshaqbaev mindetti áleýmettik medıtsınalyq saqtandyrý júıesin synaǵan bolatyn. Osydan keıin QR Densaýlyq saqtaý mınıstri Eljan Birtanov ony atalǵan máseleni ashyq alańda talqylap, tikeleı efır arqyly teledebat uıymdastyrýǵa shaqyrdy, dep xabarlaıdy QazAqparat tilshisi.

«Búginde «Eýrazııa birinshi arnasyn» biraz adamdar kóredi. Sosyn ol jerde onlaın rejımde jumys isteıtin tok-shoý bar. Sol sebepti biz osy arnany qarastyryp jatyrmyz. Budan bólek, «Habar» arnasynan da usynys bar. Eń bastysy, tikeleı efır bolýy shart. Ókinishke qaraı, tikeleı efırge kelgende barlyq arnalarda ondaı múmkindik bolmaı jatady», - dedi Birtanov jýrnalısterge bergen suxbatynda.

Mınıstrdiń aıtýynsha, tikeleı efırdi ol ózi tańdap otyr. Artynan «telebaǵdarlamany redaktsııalap, ózekti degen jerlerin kesip tastady» degen oı týyndamas úshin osyndaı sheshim qabyldandy. «Endi, qazir 21 shildege belgilep otyrmyz. Sebebi ol ýaqyt barlyǵyna yńǵaıly bolýy qajet. «Eýrazııa birinshi arnasy» da soǵan daıyn otyr. Bálkim, basqa jerde bolady. Degenmen, kelesi aptada teledebatty mindetti túrde ótkizýimiz kerek», - dep atap kórsetti Eljan Amantaıuly.