Mınıstr bıdaı men unnyń baǵasyna boljam jasady

NUR-SULTAN. QazAqparat – Qazaqstanda bıdaı qory jetkilikti jáne unnyń baǵasy sál tómendeıdi dep boljam bar. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Buǵan deıin kóktemde, kúzde Qazaqstanda bıdaı, un tapshylyǵy qatty seziledi degen áńgime shyqqan edi. Qazirgi jaǵdaı qalaı? Qysta Qazaqstanda un tapshylyǵy bolmaı ma? Osy boıynsha qandaı is-sharalar júrgizilip jatyr?», - degen suraq qoıyldy Úkimettegi baspasóz máslıhatynda.

Erbol Qarashókeev óz jaýabynda eldegi bıdaı qory jetkilikti ekenin, tapshylyqqa esh negiz joqtyǵyn aıtty.

«Ózimiz sanap kóreıikshi, bıyl 13,4 mln tonna bıdaı jınaımyz. Byltyrǵy bıdaıdan 2,5 mln tonna qaldyq qaldy. Onyń ishinde 360 myń tonna bıdaı «Azyq-túlik kelisimshart» korporatsııasy qorynda tur. Bıdaıdyń eldegi tutynylyp otyrǵan kólemi – 6-7 mln tonna. Sondyqtan aldaǵy ýaqytta jınalatyn bıdaı men qordaǵy bıdaıdy esepteńiz. Ol tutynylatyn bıdaıdyń kóleminen birneshe esege asyp tur. Sondyqtan bıdaı men un tapshylyǵy bolady deýge negiz joq», - dedi Aýyl sharýashylyǵy mınıstri.

Mınıstr joǵary sanatty unnyń baǵasy ósýi múmkin degen máselege de toqtaldy.

«Qazir naryqta bıdaıdyń baǵasy arzandap jatyr. Eki-eki jarym aı buryn bıdaıdyń baǵasy 175-180 teńgege deıin kóterilgen edi. Qazir Reseı Federatsııasynan bıdaı eksporty ashylyp, elimizge 1,2 mln tonna bıdaı eksporttalady degen boljam boldy. Ózimizde jáne ońtústikte bıdaı jınaý naýqanyn bitirdik. Astyqty jınap aldyq. Qazir soltústik óńirlerde jappaı astyq jınaý naýqany bastaldy. Josparymyz durys. Sondyqtan bıdaıdyń baǵasy 145-150 teńgege deıin tómendedi. Osyǵan qaramastan biz «Azyq-túlik kelisimshart» korporatsııasy tarapynan arzandatylǵan bıdaıdy óńirlerge jiberip jatyrmyz. Ol áleýmettik nan baǵasyn turaqty ustap turýǵa múmkindik beredi. Sondyqtan jaǵdaı turaqty. Qazir naryqtyń dınamıkasyna qaraǵanda bıdaı men unnyń baǵasy sál tómendeıdi dep boljam jasap otyrmyz. Sondyqtan Qazaqstandaǵy bıdaıdyń qory jetkilikti. Unsyz qalmaımyz», - dedi Erbol Qarashókeev.

Foto: t.me/KZgovernment