Mınıstr Beısembaev astanalyq oqýshyny óz kreslosyna otyrǵyzyp, bata berdi

ASTANA. QazAqparat - 180 eldiń memlekettik týyn biletin 6 jasar oqýshy Oqý-aǵartý mınıstri Ǵanı Beısembaevpen kezdesti, dep habarlaıdy QazAqparat.

Álemniń 180 eliniń memlekettik týyn jatqa biletin Ergen Dúısenbek Astana qalasyndaǵy mektepterdiń biriniń oqýshysy. 6 jasar bala Oqý-aǵartý mınıstrliginde bolyp, elimizdiń bas ustazy Ǵanı Beısembaevpen kezdesti. Ergen mınıstrge óz talabyn kórsetip, osy elderdiń barlyǵyna barýdy armandaıtynyn aıtty.

«Men álemniń barlyq memleketiniń týyn bilemin, biraq sonyń ishindegi eń ádemisi – bizdiń eldiń Týy. Eseıgende ataqty adam bolyp, kók baıraǵymyzdy búkil álemge tanytyp, kókke kótergim keledi», – dedi 6 jasar Ergen Dúısenbek.

Oqýshynyń anasynyń aıtýynsha, balanyń týlarǵa degen qyzyǵýshylyǵy 2-3 jasynda paıda bolǵan jáne osy jastan olardy kollektsııa etip jınaı bastaǵan. Búginde balaqaı eltańbalarǵa qyzyǵýshylyq tanytyp júr. Ata-anasynan óz týǵan kúnine Qazaqstannyń Eltańbasyn syılaýdy da ótingen.

Mınıstr Ǵanı Beısembaev daryndy jetkinshekti óziniń qyzmettik kreslosyna otyrǵyzyp, moınyndaǵy galstýgin de sheship, balanyń moınyna taqty. Keıin qol jaıyp, batasyn berdi.

«Úlken jigit bolyp ósýińe jáne tek ata-anańa ǵana emes, búkil elge qamqor bolatyn aqyldy da, batyr azamat bol», - dep tiledi vedomstvo basshysy.

Vıdeodan alynǵan kadr