Mınıstr BAQ-ta azamattar fotosýretin jarııalaýdyń normalaryn túsindirdi
Atap aıtqanda, vedomstvo basshysy Facebook-tegi paraqshasynda zań jobasy boıynsha túsinik bergen vıdeony ornalastyrdy.
«Buqaralyq aqparat quraldarymen jumysty júzege asyratyn memlekettik organdardyń qurylymdyq bólimsheleriniń mártebesi artady, bul baspasóz hatshylary men baspasóz qyzmetterine qatysty. BAQ ókilderi baılanysqa shyǵýy úshin memlekettik organ saıtynda óziniń ókiliniń baılanys málimetterin usynýy kerek. Sonymen qatar atalǵan ókil tikeleı birinshi basshyǵa baǵynýy tıis»,-dep túsindirdi mınıstr.
Onyń sózine qaraǵanda, baspasóz hatshysynyń qyzmetin toqtatýǵa jol berilmeıdi. Tek uıym taraǵan jaǵdaıda ǵana baspasóz hatshysynyń qyzmeti toqtatylady.
Sonymen qatar vedomstvo basshysy qandaı jaǵdaılarda BAQ azamattar fotosýretin jarııalaýǵa quqyly ekenin túsindirdi.
«Qazirgi ýaqytta azamattar beınesin paıdalanýǵa ruqsat suraý qajet. Endi BAQ ókilderi osyny jasamaıtyn jaǵdaılardy belgileýdi usynamyz. Tizimge mádenı jáne sporttyq sıpattaǵy buqaralyq sharalar, jıyndar, sherý, mıtıngiler jáne basqa da sharalar enip otyr»,-dedi ol.
Eger de BAQ adamdardyń bet beınesi men onyń jeke málimetteri qamtylǵan resmı aqparat alsa, azamattar fotosýretin jarııalaýǵa bolady. Sondaı-aq qoǵamdyq múddege saı jaǵdaılarda, ıaǵnı joǵalǵan adamdy izdestirý kezinde fotosýretti ruqsatsyz jarııalaýǵa jol beriledi.
«Buqaralyq aqparat quraly shyndyqqa janaspaıtyn aqparatty shyǵarsa jáne de basqa BAQ-tar túpki derekkózge silteme jasaı otyryp solaı istese, onda jaýapkershilik atalǵan aqparatty birinshi bolyp jarııalaǵan BAQ-qa júkteledi»,-dedi Dáýren Abaev.