Mınıstr aýyl sharýashylyǵyndaǵy negizgi problemalardy jarııa etti
«Eń aldymen, osy jyldyń 10 aıynda salanyń damý qorytyndylary týraly qysqasha baıandaýǵa ruqsat etińizder. Osy kezeń ishinde salanyń jalpy óniminiń kólemi 2,3%-ǵa tómendep, 6,4 trln teńgeni qurady.
Sebebi - bıylǵy anomaldy qurǵaqshylyq. Sonyń saldarynan ósimdik sharýashylyǵynyń ónimi 6,1%-ǵa azaıdy. Al mal sharýashylyǵynda ónim 3,7%-ǵa, tamaq óndirisinde 3,6%-ǵa ósti. Salanyń negizgi kapıtalyna quıylatyn ınvestıtsııalar turaqty túrde ósip, olardyń jalpy kólemi 41,9%-ǵa kóbeıdi, bul kórsetkish tamaq ónerkásibinde 5,9%-ǵa artty», - dedi E. Qarashókeev «Aýyl sharýashylyǵyn damytýdyń ózekti máseleleri men perspektıvalary» taqyrybyna arnalǵan parlamenttik tyńdaýda.
Onyń paıymynsha, sala áli de bolsa táýekeli joǵary, tabıǵı-klımattyq jaǵdaılarǵa táýeldi bolyp otyr. Onyń negizgi sebepteri – tehnıkalyq jáne tehnologııalyq artta qalýshylyq pen óndiristegi ekstensıvtik ádisterdiń basymdylyǵy.
«Atap aıtsam, ósimdik sharýashylyǵy ártaraptandyrýdy aıaǵyna jetkizýdi qajet etedi. Onda qoldanysta artta qalǵan agrotehnologııalar áli de bolsa basym, aýyspaly egis qaǵıdalary durys saqtalmaıdy, topyraq qunarlylyǵy tómendeýde. Osynyń bári jer protsesterin baqylaýdyń jetik tetikteriniń áli de bolsa joqtyǵynan bolyp otyr. Sonymen qatar, selektsııanyń eskirgen ádisterine negizdelgen tuqym sharýashylyǵy júıesi de ýaqyt talaptaryna saı emes jáne sonyń saldarynan tuqymdar boıynsha ımportqa táýeldi bolý qaýpi bar», - dedi mınıstr.
Onyń sózine qaraǵanda, mal sharýashylyǵynyń negizgi kemistigi – ol salany jem-shóp bazasynyń múmkindigine qaramaı damytýynda. Elimizde mal azyǵy zootehnıkalyq normadan 2 ese az óndiriledi. Jaıylymdardyń 20%-dan 60%-ǵa deıingi bóligi tozǵan, al jaıylymdyq alqaptardyń 42%-y sýlandyrýdyń joqtyǵynan paıdalanylmaýda.
«Veterınarııa salasynda da kemshilikter bar. Aýyldy jerlerde veterınarııalyq qyzmet kórsetý tıisti deńgeıde damymaýda. Bul salaǵa tsıfrlandyrý isteri áli de bolsa jetpegen, mamandar qaǵazbasty jumystan arylmaǵan. Sonymen qatar, ortalyq jáne jergilikti atqarýshy organdardyń veterınarııalyq qyzmetteri arasynda ókilettikterdiń arajigin tolyq ajyratý qajet. Mal dárigerleriniń jalaqysy óte tómengi deńgeıde», - dedi vedomstvo basshysy.