Mınıstr áýe reısteriniń keshigýine alańdaýshylyq bildirdi

NUR-SULTAN. QazAqparat - Indýstrııa jáne ınfraqurylymdyq damý mınıstri Qaıyrbek Óskenbaev Air Astana áýe kompanııasynyń prezıdenti Pıter Fosterge naqty mindetter júktedi. Bul týraly ol Telegram-daǵy paraqshasynda habarlady.

Vedomstvo basshysy áýe reısteriniń keshigýi men aýystyrylýy, sonymen birge bıletterdiń tapshylyǵyna baılanysty alańdaýshylyq bildirgen. Kezdesý barysynda mınıstr jańa áýe kemelerin jetkizý úrdisin jedeldetýdi jáne reısterdiń keshigýi kezinde jolaýshylardyń quqyqtary buzylmaýyn qadaǵalaýdy tapsyrdy.

«Meniń tapsyrmam boıynsha jyl sońyna deıin 5 jańa ushaq satyp alynady dep kútilýde. Atap aıtqanda, Fly Arystan áýe kompanııasynyń áýe kemeleri parki 2 ushaqpen, Air Astana - 3 samoletpen tolyqtyrylady. Jalpy 2025 jylǵa deıin 24 jańa ushaq, onyń ishinde 3 Boeing 787 Dreamliner ushaǵy keledi dep kútilýde», – dep jazdy Q.Óskenbaev.

Mınıstrdiń aıtýynsha, avıakompanııa basshysy mindettemelerdi oryndaý úshin tıisti barlyq shara qabyldanatynyn aıtyp sendirgen. Kezdesýdi qorytyndylaı kele, IIDM basshysy áýe kemeleri parkin ulǵaıtý jáne qazaqstandyq avıakompanııalardyń tasymaldaý syıymdylyǵyn arttyrý arqyly halyqqa ońtaıly jaǵdaı jasaý Prezıdentimizdiń únemi nazarynda ekenine erekshe nazar aýdardy.

Foto: taplink.cc/miir_rk