Mınıstr: «Altyn belgige» úmitker túlekterge qoıylatyn talapty kúsheıtemiz

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov Úkimet otyrysynda oqýshylardyń fýnktsıonaldyq saýattylyǵyn arttyrý úshin «Jahandyq quzyrettilikter» tańdaý kýrsy engiziletinin aıtty, dep habarlaıdy QazAqparat tilshisi.

«Akademııalyq bilimmen birge oqýshylarǵa ómirlik mańyzy zor daǵdylardy ıgertýge baǵyttalǵan «Jahandyq quzyrettilikter» tańdaý kýrsy usynylatyn bolady.

Prezıdentimiz tehnıkalyq baǵyttaǵy mamandyqtardy damytý boıynsha tapsyrma berdi. Ony oryndaý úshin matematıkalyq bilimniń sapasyn arttyrý qajet. Ol úshin oqý baǵdarlamalaryn, ádistemelik quraldardy, oqýlyqtardy jańartamyz, matematıkany toptarǵa bólip oqytýdy qolǵa alamyz.

Balalardy eńbekke daıyndaý úshin erte kásiptik baǵdarlaýǵa basa nazar aýdarylady, tıisti baǵdarlamany ózgertip, oqý-óndiristik kombınattardyń qyzmetin jańǵyrtamyz», - dedi Ashat Aımaǵambetov.

Sonymen birge, ol orta bilim berýdiń sapasyn baǵalaý úshin qorytyndy attestattaý jáne baqylaý qaǵıdalary jetildiriletinin aıtty.

«Altyn belgige» úmitkerlerge qoıylatyn talaptar da kúsheıtiledi. Bıyldan bastap bilim berý sapasyna syrttaı baǵalaý tolyǵymen eńgiziledi. Memlekettik attestattaý rásimi qaıtarylyp, profılaktıkalyq baqylaý túrinde balabaqsha, mektep, kolledj deńgeıleri úshin ótkiziledi. Zańǵa qajetti ózgerister eńgizildi», - dedi mınıstr.