Mınıstr Almatyda zańsyz salynǵan nysandardyń máselesin sheshý amaldaryn aıtty

NUR-SULTAN. QazAqparat – Almatyda ruqsat qujatynsyz 14 myńǵa jýyq nysan salynǵan. Bul týraly Senattyń jalpy otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev málim etti, dep habarlaıdy QazAqparat tilshisi.

Senattyń jalpy otyrysynda depýtat Olga Býlavkına ruqsat qujattarsyz salynǵan qurylys nysandaryna qatysty surady.

Óz kezeginde Q.Óskenbaev ruqsatsyz salynǵan qurylys nysandaryn zańdastyrý men súrip tastaý tártibi zańnamada rettelgenin jáne bul rásimder sot arqyly sheshiletinin aıtty.

«Almatynyń problemasyna toqtalsaq, sońǵy kezde qalaǵa birneshe aýdan qosyldy. Sondaǵy aýyldy eldi mekenderde zańdastyrylmaǵan nysandar kóp kezdesedi. Osy oraıda 14 myńǵa jýyq nysanǵa qatysty ruqsat qujaty rásimdelmegen. Basqa qalalarda osyndaı derekter sırek bolsa, al munda (Almatyda) kóptep kezdesedi», - dedi mınıstr.

Vedomstvo basshysy Almatydaǵy máseleni sheshýdegi qadamdar nátıjeli bolýy kerek ekenin aıtty.

Budan buryn habarlanǵandaı, múlikti zańdastyrý problemalaryn sheshý úshin jyljymaıtyn múlikti resimdeý máselelerin qaraý jónindegi komıssııa qurý usynyldy.

«Zańdastyrýǵa qatysty tehnıkalyq múmkindikter bar. ıAǵnı halyqty dúrliktirmes úshin olar qujattardy rásimdeıdi. Eger óz betimen salynǵan qurylystar Bas jospar aıasynda jol nemese basqa da ınjenerlik-kommýnaldyq jeliler ótkiziletin jerde salynsa, onda bul jerlerdi qaıtarý sheshimi qabyldanady», - dedi Q.Óskenbaev.