Mınıstr Almatydaǵy ýnıversıtette stýdentterdiń jeke derekteriniń taralýyna pikir bildirdi

<p>ASTANA. KAZINFORM &ndash; Ǵylym jáne joǵary bilim mınıstri Saıasat Nurbek Almatydaǵy joǵary oqý oryndarynyń birinde stýdentterdiń jeke málimetteriniń taralyp ketýi oqıǵasyna qatysty pikir bildirdi.</p>

«Jeke derekterdi, onyń ishinde medıtsınalyq sıpattaǵy málimetterdi zańsyz taratý – zań buzý áreketi sanalady. Osy oqıǵada zań buzý deregi bar ekenin eskere otyryp, ony baqylaýǵa aldyq. Kináliler qoldanystaǵy zańnama aıasynda jazalanady», - dedi Saıasat Nurbek Parlament Májilisinde tilshiler suraǵyna jaýap bere otyryp.

Bul turǵyda ol jeke derekterdi qorǵaý týraly zań bar ekenin eske saldy.

«Atalǵan oqıǵa - ákimshilik quqyq buzý deregi. Bul rette, jeke málimetterge nemquraıly qaraý jaǵdaıy bolýy múmkin. Sondyqtan osy máseleni qatań retteý kerek», – dedi mınıstr.

Buǵan deıin qaladaǵy ýnıversıtetterdiń birinde  WhatsApp jelisinde stýdentterdiń tizimi bar qujattar taralǵan. Onda qyzdardyń tolyq aty-jóninen basqa, olardyń JSN-i, uıaly telefon nómiri men medıtsınalyq derekteri bar.