Mınıstr 2024 jylǵy Olımpıada týraly: Quramadaǵy sportshylardy irikteý ashyq ótýi mańyzdy
Jıynda sportshylardyń iri halyqaralyq jarystarda kórsetken aralyq nátıjeleri, olardy daıarlaý júıesindegi ózgerister, medıtsınalyq-bıologııalyq qamtamasyz etý jáne dopıngke qarsy baǵdarlamalar, sondaı-aq óńirlerde olımpıadalyq sport túrleriniń jaı-kúıi men damýyna qatysty máseleler qaraldy.
Mádenıet jáne sport mınıstri Dáýren Abaev olımpıadaǵa qatysýǵa múmkindik beretin lıtsenzııalar sanyna emes, medaldardyń sapasyna nazar aýdarý qajet ekenin aıtty. Sebebi jalpy komandalyq esep altyn medaldar sany negizinde júrgiziledi. Kezdesý barysynda mınıstr federatsııa basshylary men jattyqtyrýshylarǵa birqatar tapsyrma berdi. Máselen, endigi kezekte qurama komandalarǵa jastardy tartý arqyly jasartý jáne halyqaralyq jarystarǵa irikteýdi barynsha ashyq ótkizý boıynsha jumysty belsendi júrgizý qajet.
«Joǵary jetistikter sportyn damytý úshin úlken qarajat bólinip, qoldaý kórsetilýde. Qajetti jaǵdaılar jasalyp jatyr. Degenmen mınıstrlik qaıyrymdylyqpen aınalyspaıdy. Sondyqtan ár teńge úshin qatań suraý bolady. Muny osynda otyrǵan árqaısysyńyz este saqtaýǵa tıissizder. Joǵary jetistikter sporty naqty nátıjelerge negizdeledi, qalǵany – dene shynyqtyrý. Sondyqtan bizge jańa jeńister kerek», – dedi Dáýren Abaev.
Sportty damytý dırektsııasynyń dırektory Oralbaı Jaqsymbetov Parıjde 329 medal jıyntyǵy oınalatynyn aıtty (Tokıoda 339 medal jıyntyǵy oınalǵan edi). Aıta keteıik, elimizdiń qurama komandalary osy jyldyń basynan beri 19 álem chempıonatyna jáne 20 Azııa chempıonatyna qatysyp, 140 medal jeńip aldy: onyń ishinde 35 altyn, 40 kúmis, 65 qola bar. 2022 jyldyń sońyna deıin bizdiń sportshylar taǵy 3 álem chempıonatyna jáne 3 Azııa chempıonatyna qatysady.
Úsh jarym saǵatqa sozylǵan jıynda Sporttyq medıtsına jáne ońaltý ortalyǵynyń dırektory Azamat Nurmatov, Ulttyq dopıngke qarsy ortalyqtyń dırektory Maıra Baqasheva, sport basqarmalarynyń basshylary, sport túrleri boıynsha federatsııa ókilderi jáne basqa da jaýapty tulǵalar jumys nátıjeleri týraly baıandady.
«Qurama komanda qataryna sportshylardy irikteý rásimderiniń ashyq ótýi mańyzdy. Bul bizdiń basty nazarymyzda bolady. Aldaǵy ýaqytta mınıstrlik sportshylardyń barlyq jetistikterin, jarystarǵa qatysý kestesin baqylaýǵa múmkindik beretin e-sport júıesin iske qosady. Ádilettilik pen ashyqtyq mańyzdy, sport júıesinde salaýatty básekelestik bolýy tıis», – dedi Dáýren Abaev.
Mınıstr sport basqarmalarynyń basshylaryna olımpıadalyq sport túrleriniń basymdylyǵyn eskere otyryp, joǵary sport sheberligi mektepteriniń jumys isteý qaǵıdattary men tásilderin qaıta qaraý, federatsııalarmen birlesip sport rezervin daıyndaýdyń biryńǵaı standartyn jáne oqytý baǵdarlamalaryn ázirleýdi tapsyryldy.
Foto: olympics.com