Mindetti áleýmettik medıtsınalyq saqtandyrýmen qansha qazaqstandyq qamtylǵan

NUR-SULTAN. QazAqparat – 3 mıllıonnan astam qazaqstandyq Mindetti áleýmettik medıtsınalyq saqtandyrýmen qamtylmaǵan. Bul týraly búgin «Mindetti áleýmettik medıtsınalyq saqtandyrý qory» UAQ basqarmasynyń tóraǵasy Bolat Tókejanov aıtty, dep habarlaıdy QazAqparat tilshisi.

«Medıtsınalyq saqtandyrý júıesin iske asyrýdyń birinshi jyly barlyǵymyz úshin úlken synaqqa – koronavırýs pandemııasyna tap boldy. MÁMS iske asyrýdyń birinshi jylynyń qorytyndylary medıtsınalyq saqtandyrý júıesiniń iske qosylǵanyn, osy tótenshe kezeńde densaýlyq saqtaý salasy úshin qarjylyq «qaýipsizdik jastyǵyn« qurǵanyn jáne eń bastysy, medıtsınalyq kómek kólemin ulǵaıtý úshin jaǵdaı jasaǵanyn kórsetti», - dedi ol Densaýlyq saqtaý mınıstrliginiń keńeıtilgen alqa otyrysynda.

Onyń aıtýynsha, búginde Qazaqstan turǵyndarynyń 84 paıyzy medıtsınalyq saqtandyrýǵa qatysýshy bolyp otyr. Tipti pandemııa kezide bıznestiń jáne halyqtyń tólem qabileti tómendeýine qaramastan júıege qatysýshylardyń sany 1 mln adamǵa artyp, 15,9 mln-ǵa jetti.

«Áli de 3 mln-nan astam qazaqstandyq júıemen qamtylmaǵan. Osyǵan oraı halyqty MÁMS-ke tartý boıynsha júıeli jumystardy júrgizý qajet. Óńir ákimderi «Atameken» UKP-ny, Memlekettik kirister komıtetiniń aýmaqtyq bólimshelerin jáne medıtsına uıymdaryn jumyldyrý arqyly óńirlik shtabtardyń tıimdiligin arttyrý kerek. Bul máselege turǵyndarynyń qamtylýy 80 paıyzǵa jetpeıtin Qostanaı, Almaty, Túrkistan, Jambyl oblystarynyń, Shymkent qalasynyń ákimdikteri erekshe nazar aýdarýy tıis», - dedi Bolat Tókejanov.