Mindetin durys atqarmaǵan mınıstrler máselesi Parlamenttiń nazarynda bolady – Erlan Saıyrov

ASTANA. QazAqparat – Búginde Parlamenttiń Úkimettiń jumysyn baqylaýdaǵy róli artyp keledi jáne bul baǵytta baqylaý kúsheıe túspek. Osy oraıda Májilis depýtaty Erlan Saıyrov Jibek Joly telearnasynyń «JJ Talk» baǵdarlamasynyń efırinde mınıstrler mindetine qatysty birqatar jaıtty kóterdi, dep habarlaıdy QazAqparat tilshisi.

«Áleýmettik blok boıynsha ár mınıstrge tek «AMANAT» partııasynyń ǵana emes, basqa da partııalardyń usynǵan baǵdarlamalaryn qalaı iske asyrý kerektigi týraly naqty usynys berildi. Eger mınıstrler sol baǵdarlamany oryndamaıtyn bolsa, onda olardyń mindetine qatysty máseleni kóteretindigimizdi ashyq aıttyq», – dedi Erlan Saıyrov telebaǵdarlama efırinde.

Sondaı-aq, joba júrgizýshisi halyq qalaýlysynan «másele sheshimin tappaǵan jaǵdaıda Parlament belgili bir mınıstrlerdi ornynan alyp tastaý týraly usynys bildirýi múmkin desek bola ma?» dep surady.

«Usynys bildiremiz. Qazirgi tańda naqty kandıdattar da bar. Bul jerde atyn atap, túsin tústemeı-aq qoıaıyq. Búginde ekonomıka, aýyl sharýashylyǵy salasynda naqty kandıdattar bar. Olardyń jumysyna baqylaýdy kúsheıtemiz. Bul jerde áleýmettik sala da bar. Atalǵan salaǵa Eńbek mınıstrligi jaýapty. Túrli eńbek daýlary bolyp jatady, biraq biz mınıstrliktiń eshqandaı rólin kórip otyrǵan joqpyz. Ár sala boıynsha mınıstrlerge naqty tapsyrma berildi. Bizdiń partııanyń fraktsııasy naqty júktelgen tapsyrmalar boıynsha aıyna bir ret Úkimettiń esebin tyńdaıdy. Mysaly, osy juma «Samuryq-Qazyna» ulttyq qory jaıly mektep salý boıynsha esep beredi. Shynyn aıtý kerek mınıstrlerdiń máselesi Parlament depýtattarynyń aıasynda bolady. Búginde Parlamenttiń Úkimettiń jumysyn baqylaýdaǵy róli artyp keledi», - deıdi ol.