Mılananyń ólimi: qyzdyń anasy 20 jylǵa, er adam ómir boıyna bas bostandyǵynan aıyryldy

<p>PAVLODAR. KAZIMFORM - Jeti jasar Mılana Davydovanyń ólimi boıynsha birneshe aıǵa sozylǵan sot isine núkte qoıyldy. Sottyń sheshimimen qyzdyń anasy 20 jylǵa, al ekinshi aıyptalýshy &ndash; er adam ómir boıyna bas bostandyǵynan aıyryldy. Sot úkimi jarııalanǵan sátte er adam ózine ózi qol jumsap, sol qolynyń býyn tusyn kesip jibergen.</p>

Pavlodar oblysy qylmystyq ister jónindegi mamandandyrylǵan aýdanaralyq soty jas balany óltirý boıynsha aıyptalǵan eki sottalýshyǵa qatysty qylmystyq isti qarady.

Sot barysynda memlekettik aıyptaýshy oqıǵanyń barysyn baıandady. Qyzdyń anasy D. tanysy A.-men ishimdikti júıeli ishe otyryp, sońy ıntımdi qarym-qatynasqa ulasqan.

Áıeldiń kúıeýi mal baǵýǵa ketse, al balalary mektepte bolǵan. Sony paıdalanyp ekeýi jynystyq qarym-qatynasqa túsken. Osy ýaqytta qyzy Mılana Davydova mektepten oralyp, anasynyń uıatsyz qylyǵyna kýá bolǵan. Oqıǵany ákesine jetkizip baratyn aıtqan.

«Ekeýi masań kúıde jas balany óltirýge sheshim qabyldaǵan. Osy nıetterin júzege asyra otyryp, qyzdyń anasy onyń basynan birneshe ret qatty soqqy jasaǵan. Edenge qulaǵannan keıin, esin joǵaltqansha ony beldikpen urǵan. Sodan keıin er adam jábirlenýshiniń aǵasynyń kózinshe jas balany beldikpen býyndyryp óltirgen. Sottalýshylardyń kinási kýálardyń aıǵaqtarymen, sot saraptamalarynyń qorytyndylarymen jáne sotta zerttelgen basqa da dáleldemelermen dáleldendi», - dep habarlady Pavlodar oblystyq sotynyń baspasóz qyzmetinen.

Sotta marqum qyzdyń anasy kinásin moıyndamady. Er adam da óziniń kinásin moıyndamaı, is-áreketin onsha aýyr emes, ıaǵnı qylmysty jasyryp qalý jáne qylmys týraly habarlamaý retinde qaıta saralaýdy surady.

Er adam buryn sottalǵan, psıhoaktıvti zattarǵa táýeldilikten zardap shegedi, qylmysty masań kúıde jasaǵan. Osyny jáne asa aýyr qylmys jasaýdyń mán-jaılaryn eskere otyryp, sottyń úkimimen er adamǵa ómir boıyna bas bostandyǵynan aıyrý jazasy taǵaıyndaldy.

Al Qylmystyq kodekstiń 46-babynyń 4-bóligine sáıkes ómir boıyna bas bostandyǵynan aıyrý jazasy áıelderge taǵaıyndalmaıtyndyǵyna baılanysty, sot áıeldi 20 jylǵa bas bostandyǵynan aıyrdy. Sondaı-aq, ol pedagogıkalyq jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyryldy.

Sot úkimi zańdy kúshine engen joq.

Atap óterligi, sottyń úkimi oqylǵan sátte aıyptalýshy A. ózin-ózi ótkir zatpen jaraqattaǵan. 

"Búgin sot zalynda 7 jasar Mılana Davydovany óltirdi dep aıyptalǵan aıyptalýshy sot úkimi shyqqan kezde sol qolynyń býynyn kesip tastady. Aıyptalýshyny dárigerler tekseredi, medıtsınalyq kómek pen aýrýhanaǵa jatqyzýdyń qajeti joq", - delingen oblystyq ІІD habarlamasynda.

Eske sala keteıik, Mılana byltyr 17 qarasha kúni Ekibastuzdan 50 shaqyrym jerdegi Besqaýǵa aýylynda joǵalyp ketti.

Osy kúni keshkisin saǵat 9:00 shamasynda qyzdyń anasy polıtsııaǵa shaǵym túsirdi. Mılanany eki táýlik boıy 400 adam izdedi.

Tipti izdeý jumystaryna tikushaq pen kınologter de jumyldyryldy.

19 qarashada 7 jasar Mılananyń denesi qoqystan tabyldy.

Mılananyń óliminen soń oblys ákiminiń orynbasary, Ekibastuzdyń ákimi, basqarma basshylary sógis aldy.