Mıkrokredıtterdiń eń kóp kólemi qaı oblystarda berilgeni anyqtaldy

<p>ASTANA. KAZINFORM &ndash; QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov mıkroqarjy uıymdarynyń qyzmetine túsinik berdi.</p>

«Memleket basshysynyń tapsyrmasy boıynsha 2020 jyldan bastap Agenttiktiń retteýine onlaın-kredıt berý kompanııalary, kredıttik seriktestikter men lombardtar engizildi. 2021 jyldan bastap mıkroqarjylyq qyzmetti lıtsenzııalaý zańnamalyq deńgeıde bekitildi. Nátıjesinde, 5 myńnan astam mıkrokredıtteý sýbektilerinen 1 110 kompanııa lıtsenzııa aldy, qalǵandary taratyldy nemese qyzmet túrin ózgerti. Qazirgi kezde 220 mıkroqarjy uıymynda, 215 kredıttik seriktestikte jáne 516 lombardta mıkroqarjylyq qyzmetti júzege asyrýǵa lıtsenzııasy bar», - dedi O. Qızatov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, qazir mıkroqarjylandyrý sektory elimizdiń qarjy sektorynyń eń jyldam damyp kele jatqan segmentine aınaldy. Keıingi úsh jylda mıkroqarjylyq qyzmetti júzege asyratyn uıymdar men nesıe portfeliniń aktıvteri 2 eseden astam ósip, nesıe portfeli boıynsha 2,4 trln teńgege jetti.

«Máselen, 3 jyldyq kezeńde mıkroqarjylandyrý sýbektileriniń nesıe portfeliniń qurylymynda bızneske baǵyttalǵan mıkrokredıtter kólemi 2 ese ulǵaıyp, nesıe portfelindegi jalpy kólemniń 56 paıyzyn qurady. Sonymen qatar, nesıe portfeliniń aıtarlyqtaı ósýine qaramastan, NPL deńgeıi (merzimi ótken nesıe) 3,9% deńgeıinde saqtaldy», - dedi agenttik ókili.

Onyń sózine qaraǵanda, sońǵy 3 jylda bul sektorda bızneske baǵyttalǵan mıkrokredıtter 2 ese, ıaǵnı 1,3 trln teńgege deıin ulǵaıdy. Óńirler boıynsha mıkrokredıtterdiń eń kóp kólemi Pavlodar (23%) jáne Qostanaı oblystaryna (13%) mıneraldyq resýrstardy óndirýmen jáne elektr energııasymen jabdyqtaýmen baılanysty ónerkásip sektorlaryna tıesili.

Saýda jáne qyzmet kórsetý sektorlaryna kredıt berý Shymkent (10%), Astana (7,3%), Almaty (5,4%) qalalarynda jáne Túrkistan (9,8%) jáne Jambyl (5,3%) oblystarynda basym.

«Eger ekonomıka salalary boıynsha kredıt berýdiń jıyntyq kólemin qarastyratyn bolsaq, mıkroqarjylandyrý sýbektileriniń qyzmeti kóbine ónerkásip pen elektr energııasymen jabdyqtaýǵa (35,1%), aýyl sharýashylyǵyna (25,1%), saýdaǵa (17,5%) qatysty salalarda jáne qyzmet kórsetý (14,9%) salasynda shoǵyrlanǵan. Kredıtorlar boıynsha Qazaqstannyń 20 oblysynyń 17-sinde kredıttik seriktestikter bergen mıkrokredıtter úlesi joǵary (68%). 2023 jyldyń nátıjesi boıynsha bızneske kredıttik seriktestikter bergen mıkrokredıtter 932 mlrd teńgeni nemese kredıttik seriktestikterdiń jıyntyq portfeliniń 96%-yn qurady», - dedi Oljas Qızatov.

Mıkroqarjy sýbektileri Qazaqstannyń barlyq oblysynda bar. 2023 jyldyń qorytyndysy boıynsha MQU-nyń bızneske mıkrokredıtteri 433 mlrd teńgeni nemese MQU jıyntyq portfeliniń 35,2 paıyzyn qurady. MQU-lar jaǵynan bızneske mıkrokredıt berýdiń negizgi kólemi Túrkistan oblysyna (17,0%), Shymkent qalasyna (16,8%), Almaty oblysyna (11,1%) jáne Jambyl oblysyna (10,4%) tıesili.