Mıkrokredıt uıymdarynyń qyzmetin retteý jalǵasady – Úkimet basshysy

ASTANA. QazAqparat – Qazaqstandyqtardyń shaǵyn nesıe alý arqyly qaryzǵa batýyna jol bermeý úshin mıkroqarjy uıymdardyń qyzmetin retteý kúsheıe túspek. Bul týraly QR Premer-Mınıstri Álıhan Smaıylov málim etti, dep habarlaıdy QazAqparat tilshisi.

«Búgin Qarjy naryǵyn retteý agenttiginiń tóraǵasy mıkrokredıtke qatysty qandaı jumys júrgizilip jatqanyn egjeı-tegjeıli aıtty. Mıkrokredıt uıymdarynyń qyzmetin retteýge qatysty osyǵan deıingi jumystar odan ári jalǵasady. Azamattarymyz shaǵyn nesıe alý arqyly qaryzǵa batyp, ómirde qıyn jaǵdaıǵa tap bolýyna jol bermeý úshin mıkroqarjy uıymdardyń qyzmetin retteýdi kúsheıtý kerek. Bul degenimiz - tabysy tómen azamattarǵa mıkrokredıtterdi berýdi shekteý», - dedi Álıhan Smaıylov Úkimet úıinde ótken baspasóz máslıhatynda.

Úkimet basshysynyń málimdeýinshe, shekteý qoıýdaǵy maqsat – azamattarǵa tabys kólemine qaraı qyzmet kórsetý, sonymen qatar mıkrokredıt naryǵynyń turaqtylyǵyn qamtý.

Buǵan deıin Álıhan Smaıylov McDonald's-tyń ketýine qatysty pikir bildirgen edi.

Odan bólek, Premer-Mınıstr aldaǵy 2-3 jylda elimizdegi jylý elektr ortalyqtarynyń qaıta jańaratynyn aıtty.