Mıkroqarjy ombýdsmeni ınstıtýty 21 jeltoqsanda jumysyn bastaıdy

<p>ASTANA. KAZINFORM &ndash; Qarjy naryǵyn retteý jáne damytý agenttigi qaryz alýshylardyń quqyqtaryn qorǵaıtyn mıkroqarjy ombýdsmeni ınstıtýty 21 jeltoqsanda jumysyn bastaıtyn habarlady.</p>

Agenttik aqparatynda mıkroqarjy ombýdsmeni qazaqstandyqtardyń mıkrokredıtterge baılanysty daýlaryn, sonyń ishinde merzimi ótken qaryzdardy rettep, kollektorlyq agenttiktermen týyndaǵan máselelerdi qaraıtyny aıtylǵan.

- Ombýdsmenniń kómegine tek mıkroqarjy uıymdarynyń (MQU) klıentteri – jeke tulǵalar júgine alady. Onyń qyzmetteri tegin bolady. Ombýdsmen táýelsiz tóreshi retinde áreket etip, daýlardy sotqa júginbeı sheshýge yqpal etedi. Bul rette ombýdsmen qabyldaǵan sheshimdi mıkroqarjy uıymy men qaryz alýshy oryndaýǵa mindetti. Eger taraptardyń kelisimimen basqa merzim belgilenbese, mıkroqarjy ombýdsmeniniń sheshimi 30 kúnniń ishinde oryndalýy kerek, - dep jazady agenttiktiń resmı saıty.

Resmı aqparatta mıkroqarjy ombýdsmeniniń quzyretine sotqa joldanǵan ister nemese zańdy kúshine engen sot aktileri kirmeıtini de aıtylǵan.

- Sondaı-aq dáleldenbegen jaǵdaılar boıynsha nemese jańa mán-jaılary anyqtalmaı qaıta joldanǵan ótinishter qaralmaıdy, - dep jazady agenttik mamandary.

Vedomstvonyń deregi boıynsha, elimizde mıkroqarjy qyzmetterin kórsetetin 220 uıym, 215 kredıttik seriktestik jáne 497 lombard bar.

Buǵan deıin mıkroqarjy uıymdaryna boryshkerlerge saǵat 21:00-den keıin qońyraý shalýǵa tyıym salynatynyn jazǵan edik.