Mıhaıl Saakashvılı Odessa oblysynyń gýbernatory bolyp taǵaıyndaldy

ASTANA. QazAqparat - Ýkraına prezıdenti Petr Poroshenko Grýzııanyń burynǵy prezıdenti Mıhaıl Saakashvılıdi Odessa oblysynyń gýbernatory etip taǵaıyndady. Tıisti usynysty buǵan deıin Ýkraınanyń mınıstrler kabıneti jasaǵan bolatyn.

Poroshenkonyń Saakashvılıdi Odessa oblystyq memlekettik ákimshiliginiń basshysy etip taǵaıyndaýy týraly Jarlyqqa qol qoıǵanyn RBK-Ýkraınaǵa Ýkraına Prezıdenti ákimshiliginen habarlaǵan. Qazirgi kezde Ýkraına prezıdentiniń saıtynda oblystyq memlekettik ákimshiliktiń jańa tóraǵasyn taǵaıyndaý týraly Jarlyq ornalastyrylmaǵan.

Saakashvılıdiń Odessa oblysynyń gýbernatory bolyp taǵaıyndalǵany týraly aqparatty Odessa oblystyq memlekettik ákimshiliginiń baspasóz hatshysy Nıkolaı Pokrovskıı rastady. «Saǵat 14:30 (jergilikti ýaqyt boıynsha) Odessa oblystyq memlekettik ákimshiliginiń jańa basshysyn tanystyrý ótedi, ıá, ol Mıhaıl Saakashvılı», - dep jazdy ol Facebook áleýmettik jelisindegi jeke paraqshasynda. Qazirgi gýbernator Igor Palıtsa baspasózben tanystyrý ótken soń sóılesýge daıyn, dep qosyp ótti Pokrovskıı.

Grýzııanyń burynǵy prezıdenti Odessa oblystyq memlekettik ákimshiliginiń basshysy qyzmetine taǵaıyndalýy týraly usynysty juma kúni Poroshenkoǵa Ýkraına úkimeti joldaǵan bolatyn.

Odan keıin Joǵarǵy Rada depýtaty Mýstafa Naıem Twitter-degi jeke paraqshasynda Saakashvılıdiń Ýkraına azamattyǵyn alǵanyn habarlaǵan. Bul aqparatty óziniń mıkroblogynda taǵy bir ýkraınalyq parlamentarıı Sergeı Leşenko rastaǵan. Taǵaıyndalýy múmkin týraly aqparattyń taratylýynan keıin Grýzııanyń burynǵy prezıdenti Facebook-tegi paraqshasynda Odessany jaqsy kóretinin jazǵan.