Mıhaıl Mıshýstın Qazaqstanǵa qonaqjaılylyǵy úshin alǵys bildirdi
«Qurmetti Eýrazııalyq úkimetaralyq keńes otyrysyna qatysýshylar, áriptester, dostar! Eń aldymen, ózderińizge Reseı Prezıdenti Vladımır Vladımırovıch Pýtınniń izgi tilegin jetkizgim keledi jáne Qazaqstanǵa qonaqjaılylyq pen sharany tamasha uıymdastyrǵany úshin alǵys aıtamyn», - dep bastady sózin Mıhaıl Mıshýstın.
Onyń aıtýynsha, Reseı Federatsııasy ıntegratsııalyq qurylysty nyǵaıtýǵa baǵyttalǵan baǵdardyń sabaqtastyǵyn qamtamasyz etedi.
«Bul óńirimizdiń ekonomıkalyq turaqtylyǵy úshin qajet. Reseı Prezıdenti Vladımır Pýtın atap ótkendeı, EAEO turaqty damyp kele jatyr jáne óz tıimdiligi men qajettiligin aıqyn kórsetip otyr. Osy ýaqytqa deıin memleketter arasyndaǵy ózara saýdanyń absolıýtti kólemi bir jarym eseden astamǵa artty. Syrtqy saýda eki esege jýyq ulǵaıdy. Іshki saýda aınalymynda qosylǵan quny joǵary shıkizattyq emes taýarlar úlesi artyp keledi. Biz birge eń qıyn synaqtarǵa tótep bere alamyz», - dedi Mıhaıl Mıshýstın.
Onyń aıtýynsha, syrtqy qysymǵa jáne kúrdeli halyqaralyq jaǵdaıǵa qaramastan, EAEO tıimdi jumys istep jatyr. Sonymen qatar týyndaǵan máselelerdi ózara qoldaý negizinde der kezinde sheshýge daıyn. Bul tásil turaqtylyqty saqtaýǵa múmkindik beredi.
«Tóraǵalyqtyń basymdyǵy retinde Reseı Prezıdenti «bestiktiń» tehnologııalyq áleýetin damytýdy, shynaıy táýelsizdikke qol jetkizýdi atap ótedi. Sondaı-aq tsıfrlyq transformatsııa salasyndaǵy ózara is-qımyldy jandandyrý qajet, bul rette EAEO ortaq naryǵy jańa joǵary tehnologııalyq kásiporyndardy iske qosyp, óndiris protsesine zamanaýı sheshimderdi engizý úshin jaǵdaılardy qamtamasyz etýi tıis. Azyq-túlik qaýipsizdigi salasynda birtutas saıasat júrgizýdiń de mańyzy zor. Biz ortaq energetıkalyq naryq qurý boıynsha birlesken sheshimder qabyldaýdy jalǵastyrýymyz kerek. Biz birigip, dosymyzǵa jatpaıtyn elderdiń valıýtalaryn paıdalanýdan týyndaıtyn ekonomıkalyq táýekelderdi azaıtýǵa tıispiz», - dep atap ótti RF Úkimetiniń basshysy.
Onyń aıtýynsha, taǵy bir basymdyq – jańa kólik-logıstıkalyq ınfraqurylymdy qalyptastyrý, sondaı-aq EAEO men syrtqy seriktester men halyqaralyq birlestikter arasynda ózara tıimdi jáne teń quqyly yntymaqtastyqty qurý.
Buǵan deıin Almatyda Eýrazııalyq úkimetaralyq keńestiń shaǵyn quramdaǵy otyrysy ótip jatqany týraly jazǵan bolatynbyz.