Microsoft korporatsııasy SQO pedagogyn Alǵys hatpen marapattady

PETROPAVL. QazAqparat – Petropavldaǵy Nazarbaev zııatkerlik mektebiniń fızıka páni muǵalimi Danııar Ýálıev Microsoft Kazakhstank korporatsııasynyń Alǵys hatymen marapattaldy, dep habarlaıdy QazAqparat tilshisi.

SQO NZM baspasóz qyzmetiniń málimetinshe, dúnıejúzindegi iri kompanııalardyń biri, baǵdarlamalyq qamsyzdandyrý óndirisiniń kóshbasshysy mektep ustazynyń jumysyna joǵary baǵalady.

Danııar Ýálıev 2019-2020 jylǵy Microsoft Innovative Educator Expert sertıfıkatynyń ıegeri, bilikti maman. Ol eldegi jaǵdaıǵa baılanysty oqýshylardyń qashyqtan oqýyn uıymdastyrýǵa kómek kórsetti, bilimimen bólisti.

«NZM ujymy oqý ornynyń dırektory Nurǵalı Elshibekovtyń bastamasymen Microsoft ónimderin ekinshi jyl qatarynan tıimdi qoldanyp keledi. Microsoft Teams, OneNote, OneDrive jáne de ózge qosymshalarymen jumys aýa raıy qolaısyz bolǵanda oqý protsesin sapaly uıymdastyrýǵa kómektesti. Al qazirgi pandemııa jaǵdaıynda Microsoft ónimderi oqýshylarǵa onlaın bilimdi sapaly berýge septigin tıgizip jatyr», - deıdi Danııar Ýálıev.

Tsıfrlyq qosymshalardy jetik meńgerip, oqý protsesinde tıimdi qoldanyp júrgen ustaz óz tájirıbesimen Nur-Sultan, Almaty, Petropavl qalalarynyń jalpy bilim beretin mektepteriniń muǵalimderimen bólisti.

«Danııar qazaqstandyq bilim berý júıesiniń damýyna baǵa jetpes úlesin qosyp keledi. Pedagogtardyń, oqýshylardyń zamanaýı tsıfrlyq quziretin arttyryp, ol óziniń yqylas-yntasymen «Tsıfrly Qazaqstan» memlekettik baǵdarlamasynyń júzege asýyna kómegin berýde», - dep jazdy Miscrosoft Kazakhstan basshysy Tıbor Koleıak mektep dırektory Nurǵalı Elshibekovke jibergen Alǵys hatynda.