Mıchıganda qoldan jasalǵan bomba jarylyp, mektep oqýshylary jaraqat aldy

NЬıÝEIGO. QazAqpararat – AQSh-tyń Nıýeıgo qalasyndaǵy (Mıchıgan shtaty) mektepterdiń birinde oqýshy qoldan jasalǵan jarylǵysh qurylǵyny mektepke ákelip, abaısyzda iske qosqan, dep habarlady shtat polıtsııasy. Bul jaıynda QazAqparat MLive.com saıtyna silteme jasap habarlaıdy.

Dúısenbi kúni tańerteń synypta qoldan jasalǵan bomba jarylyp, tórt oqýshy men muǵalim jeńil jaraqat aldy.

Shtat polıtsııasy qurylǵyny ákelgen 16 jasar oqýshynyń orta dárejeli jaraqat alǵanyn aıtty.

Muǵalim men tórt oqýshy medıtsınalyq kómekke júgingen.

Nıýeıgo polıtsııasy 08:52-de synyptaǵy jarylys týraly habar alǵan, deıdi shtat polıtsııasy.

Aldyn ala málimet boıynsha, 16 jastaǵy jasóspirim qoldan jasalǵan bombany mektepke ákelip, ony abaısyzda iske qosqan. Tergeý amaldary bastaldy.

Nıýeıgo okrýginiń barlyq basqa mektepteri polıtsııa oqýshylarǵa basqa eshteńe qaýip tóndirmeıtinin anyqtaǵanǵa deıin jabyldy.

Polıtsııa bombanyń neden jasalǵanyn jáne oqýshy ony mektepke ne úshin ákelgenin anyqtap jatyr.

Mınalardy tazartý jónindegi memlekettik polıtsııa jasaǵy, FBR jáne Alkogol, temeki, atys qarýy jáne jarylǵysh zattar jónindegi federaldy bıýro (ATF) oqıǵa ornynda.

Olar paıdalanylǵan jarylǵysh zattardy anyqtaýǵa kómektesýde.

Polıtsııa turǵyndardan mektepke jaqyndamaýyn surady.