Mıchıgan ýnıversıtetinde er adam stýdentterge oq jaýdyrdy, úsh adam kóz jumdy

IST-LANSING. QazAqparat – Dúısenbi kúni tańerteń Mıchıgan shtaty ýnıversıtetindegi atystan úsh adam qaza tapty. Taǵy beseýi jaraqat alyp, jergilikti aýrýhanada jatyr, dep habarlaıdy QazAqparat CNN-ge silteme jasap.

Jergilikti polıtsııaǵa turǵyndar habarlasyp, maska kıgen belgisiz bireý Mıchıgan shtaty ýnıversıtetiniń kampýsynda jergilikti ýaqytpen saǵat 20:18-de oq jaýdyrǵanyn jetkizgen.

Polıtsııanyń málimetinshe, shabýyldaǵan adam ýnıversıtettiń eki jerinde stýdentterge oq atqan. Ázirge úsh adamnyń mert bolǵany belgili, beseýi jaraqat alǵan.

Shabýylshynyń denesin polıtsııa qyzmetkerleri tapqan – ol shabýyldaǵannan keıin óz-ózine oq atqan.

Foto: COURTESY OF MSU POLICE VIA AP

Polıtseıler shabýyldaýshynyń 43 jasta ekenin anyqtady. Onyń ýnıversıtetke esh qatysy joq. Onyń nelikten bul qadamǵa barǵany ázirge belgisiz.

Ýnıversıtet ókilderiniń aıtýynsha, shabýyldaýshy oq atqan eki ǵımarat ta jumys kezinde ashyq bolǵan – onyń bireýi sabaq oqýǵa, ekinshisi stýdentter keńesiniń kezdesýine arnalǵan.

Basty foto: AL GOLDIS / AP