Mıchıgan shtatynda damba buzylyp, 10 myń adamdy evakýatsııalap jatyr

NUR-SULTAN. QazAqparat – AQSh-tyń Mıchıgan shtatynda nóser jaýyn saldarynan Tıttabavası ózenindegi damba buzyldy. Bılik ókilderi Mıdlend aımaǵynyń 10 myńǵa jýyq turǵynyn qaýipti aımaqtan evakýtsııalap jatyr, dep habarlaıdy QazAqparat Associated Press-ke silteme jasap.

Mıdlend ókiletti okrýgi Keńesiniń tóraǵasy Mark Bone 10 myńǵa jýyq adam turatyn 3,5 myń úıge evakýatsııa týraly habarlanǵanyn málim etti. Onyń aıtýynsha, ázirge sý basqan aımaqtardan zardap shekkender týraly málimet kelip túsken joq.

Jergilikti bılik ókilderiniń aıtýynsha, bul óńir tarıhyndaǵy eń aýqymdy sý tasqyny bolýy múmkin. Mıchıgan shtatynyń gýbernatory Grethen Ýıtmer sý tasqyny ásirese Mıdlendtiń ortalyǵyna qaýip tóndirgenin aıtty. Qalada, Tıttabavası ózeniniń jaǵasynda Dow Chemical hımııalyq zaýyty ornalasqan. Oǵan da sý astynda qalý qaýpi tónip tur.

Grethen Ýıtmer Mıdlend aımaǵynda tótenshe jaǵdaı jarııalap, sý basý qaýpi tónip turǵan aýdan turǵyndaryn qaýipsiz jerge kóshýge nemese evakýatsııalyq ortalyqtardyń birine ornalasýǵa shaqyrdy.