Mezgilsiz qaıtys bolǵan senator Gúlmıra Kárimovanyń ornyna 5 kandıdat tirkeldi

PETROPAVL. QazAqparat – Sotústik Qazaqstan oblysynan saılanyp, kenetten kóz jumǵan Senat depýtaty Gúlmıra Kárimovanyń bos qalǵan mandatyn ıelený úshin 5 kandıdat tirkeldi. Úmitkerler saılaýshylardyń qolyn jınaýǵa kiristi, dep habarlaıdy QazAqparat tilshisi.

Ákimdik saıtynda jarııalanǵan habarlamada jazylǵandaı, oblystyq saılaý komıssııasyna ózin-ózi usyný tártibimen Parlament Senatynyń depýtattyǵyna úmitti myna 7 kandıdat qujat tapsyrǵan:

- Melehov Sergeı Vladımırovıch;

- Mahınıa Evgenıı Sergeevıch;

- Esdáýletov Jaqsylyq Tóleýuly;

- Jalǵasbaev Birjan Nurmahanuly;

- Rafalskıı Anatolıı Bronıslavovıch;

- Rahmetova Ásem Qalashbaıqyzy;

- Qasenova Raýza Ivanovna.

«Bir kandıdattyń QR Konstıtýtsııasynyń jáne «QR saılaý týraly» zańynyń talaptaryna, ıaǵnı QR men SQO aýmaǵynda turaqty turý bóligine sáıkes kelmeýine baılanysty usynylýy toqtatyldy. Bir kandıdat óz erkimen kandıdatýrasyn qaıtaryp aldy. 5 kandıdattyń talaptarǵa sáıkestigi anyqtaldy. Parlament Senatynyń depýtattyǵyna kandıdattardy qoldaý úshin saılaýshylardyń qoldaryn jınaý rásimi bastaldy», - delingen ákimdik saıtynda jarııalanǵan habarlamada.

Esterińizge sala ketsek, 27 qańtarda jańadan saılanǵan senator Gúlmıra Kárimova kenetten qaıtys boldy. Oǵan «anafılaksııalyq shok» aldyn ala dıagnozy qoıyldy. Degenmen, keıin Astana qalalyq Qoǵamdyq densaýlyq saqtaý basqarmasynyń baspasóz qyzmeti Gúlmıra Kárimovanyń ólimine tikeleı sebep júrek talmasy ekenin aıtty.

Keıin Ortalyq saılaý komıssııasy tóraǵasynyń orynbasary Konstantın Petrov Gúlmıra Kárimovanyń ornyna jańa senatordy saılaý qashan ótetinin málim etti.