Meıveızer GGG-diń biraz tabysyn «jep qoıýy» ábden múmkin
AQSh-tyń buqaralyq aqparat quraldary taratqan málimetke sáıkes, "Mayweather Promotions" kompanııasy Las-Vegas qalasyndaǵy "MGM Grand" arenasyna tapsyrys berip otyr. Dál sol jerde Floıd kishi Meıveızer men Konor Makgregordyń arasynda jekpe-jek ótýi ábden múmkin. Al Golovkın-Alvares jekpe-jegi "T-Mobile Arena" sport kesheninde ótedi degen jospar bar. Alaıda Meıveızer óz jekpe-jegin 26 tamyzda uıymdastyrýdyń arqasynda PPV-diń (aqyly translıatsııalardyń - avt.) biraz bóligin "jep qoıaıyn" dep tur. Osy jaıynda amerıkalyq jýrnalıster aıtty.
"Floıd Meıveızerdiń Las-Vegastaǵy "MGM Grand" arenasyna tapsyrys berýi Golovkın men Alvares úshin jaǵymdy jańalyq emes. Halyqtyń nazary sol jekpe-jekke aýyp ketýi ábden múmkin. Óıtkeni Meıveızer men Makgregordyń jekpe-jegi úsh apta buryn ótedi. PPV-diń baǵasy 75-100 dollardyń aınalasynda bolady degen aqparat bar. Eger fanattar óz aqshasyn aldymen Meıveızer men Makgregor arasyndaǵy jekpe-jekti kórý úshin jumsaıtyn bolsa, onda artynan Golovkın men "Kaneloǵa" taǵy 60 dollarǵa shyǵyndalýǵa týra keledi. Oǵan bári birdeı kelispeıtin shyǵar. Sebebi bir aıda aqyly telekórsetilimge 170 dollar jumsaý qajet. Ony barlyq jankúıerler kótere almaıdy", - deıdi Boxingnewsresults.com jýrnalısi Rıch Cheını.
Onyń oıynsha, Golovkın-Alvares jekpe-jegin uıymdastyrý sharalarymen aınalysatyn "Golden Boy Promotions" kompanııasy úshin ýaqytty aýystyrǵan tıimsiz. Sebebi Oskar De La Hoııa "T-Mobile Arena"-syna tapsyrys berip qoıdy. Jekpe-jekti jarnamalaý jumystary da bastalyp ketken.