Meıirgerler densaýlyq saqtaý júıesindegi eń kóp kásibı toptardyń biri – Álnazarova

<p>ASTANA. KAZINFORM &ndash; Densaýlyq saqtaý mınıstri Aqmaral Álnazarova Qazaqstandaǵy meıirgerlerdi kásibı merekesimen quttyqtady.&nbsp;</p>

Densaýlyq saqtaý mınıstrliginiń deregi boıynsha, elimizdegi medıtsınalyq uıymdarda 190 myńnan astam orta medıtsına qyzmetkeri jumys isteıdi. Onyń 54 myńnan astamy aýyldy jerlerde eńbek etip júr. 

«Meıirgerler Qazaqstannyń densaýlyq saqtaý júıesindegi eń kóp kásibı toptardyń birin quraıdy. Ýaqyt talaptaryna sáıkes orta medıtsına qyzmetkerleriniń emdeý protsesine qatysýy artyp keledi, patsıenttiń densaýlyǵy úshin kásibı jaýapkershilik sııaqty fýnktsıonal keńeıip keledi. Elimizdegi meıirgerlerdi kásibı merekelerimen quttyqtaımyn. Sizderdiń kúndelikti eńbekterińiz ben shydamdylyqtaryńyzdyń, qaıyrymdylyqtaryńyzdyń jáne kóp jyldyq tájirıbelerińizdiń arqasynda em alýshylardyń densaýlyǵy qalpyna kelýde», - dedi mınıstr Aqmaral Álnazarova. 

Kásibı mereke qarsańynda Qazaqstannyń meıirger isiniń 350-den astam úzdik mamany vedomstvolyq nagradalarmen: «Eńbek ardageri» medalimen, «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» tósbelgilerimen, qurmet gramotalarymen jáne alǵys hattarmen marapattaldy.