Meıramhanada janjal shyǵarǵan atyraýlyq bloger 850 myń teńge ótemaqy tóledi

<p>ATYRAÝ. KAZINFORM &ndash; Atyraýda bloger aldymen dúkende janjal shyǵarǵan. Keıin meıramhanada kámeletke tolmaǵan jasóspirimder jumys isteıtinin kórsetken soń toı bolmaı qalǵan. Toı ótkizýshi meıramhana ıesine jaldaý qunyn tóleýden bas tartqan.</p>

Atyraý qalalyq sotynda dúken men meıramhananyń ıeleriniń shaǵymyna baılanysty azamattyq is qaraldy. Eki talap qoıýshy blogerge ar-namysy men qadir-qasıetin, iskerlik bedelin qorǵaý, moraldyq zııan ótemaqysyn óndirý, jaýapkerdi áleýmettik jelilerde ruqsatsyz jarııalanǵan foto men beınejazbalardy óshirýdi mindetteý týraly talap qoıý aryzyn bergen. 

«Bloger talap qoıýshyǵa tıesili dúkende taýarlarǵa qatysty janjal shyǵaryp, barlyǵyn beınejazbaǵa túsirgen. Birneshe ret talap qoıýshyny urǵan. Talap qoıýshy blogerdiń qolynan urǵan. Bolǵan jaǵdaıdyń barlyǵyn talap qoıýshynyń qyzy beınejazbaǵa túsirip, áleýmettik jelige júktegen. Nátıjesinde eki áıel adam buzaqylyq úshin ákimshilik jaýaptylyqqa tartylǵan», - dep habarlady sottyń baspasóz qyzmeti.

Keıin bloger toı saltanaty ótip jatqan meıramhanaǵa kelip, tikeleı efırge shyqqan. 

«Meıramhanada kámeletke tolmaǵandar jumys isteıdi dep kórsetken. Osynyń saldarynan toı bolmaı, qonaqtar tarap ketken. Al, tapsyrys berýshi talap qoıýshyǵa tólem jasaýdan bas tartqan. Sot blogerden talap qoıýshynyń paıdasyna 850 myń teńge moraldyq zııan ótemaqysyn óndirip, meıramhanada kámeletke tolmaǵandar jumys isteıdi degen jalǵan aqparatty áleýmettik jelide tikeleı efır arqyly teriske shyǵarýdy mindettedi. 

Al, bloger talap qoıýshynyń qyzy dúkende bolǵan janjaldyń beınejazbasyn óziniń ruqsatynsyz júktegenin kórsetip, talap qoıýshylarǵa moraldyq zııandy óndirý, jalǵan málimetterdi teriske shyǵarý týraly qarsy talap qoıý joldaǵan. 

«️Blogerdiń qarsy talap qoıýy ishinara qanaǵattandyryldy. Onyń kelisiminsiz áleýmettik jelide jarııalanǵan sýretti zańsyz paıdalanǵany úshin talap qoıýshylardan 250 myń teńge moraldyq zııan ótemaqysy óndirildi», -dep málim etti atalǵan sottan. 

Sot sheshimi zańdy kúshine engen joq.

Eske sala ketelik, buǵan deıin Atyraýda blogerlerge kúsh qoldanǵan jigitke 461 myń teńge aıyppul salynǵanyn jazǵan bolatynbyz.