Meıram Qajyken Ońtústik Qazaqstan memlekettik pedagogıkalyq ýnıversıtetinde boldy

ShYMKENT. QazAqparat – QR prezıdenttigine kandıdat Meıram Qajyken Shymkenttegi Ońtústik Qazaqstan memlekettik pedagogıkalyq ýnıversıtetinde boldy. JOO stýdentterimen jáne oqytýshylarymen kezdesý ótkizdi, dep habarlaıdy QazAqparat kandıdattyń shtabyna siltememen.

Kezdesýde stýdentter kandıdatqa suraqtar qoıyp, bilim berý, mádenıetti damytý, saıasatpen qatar ekonomıka men ulttyq qaýipsizdik taqyryptaryn da kóterdi.

Aıta keteıik, Ońtústik Qazaqstan memlekettik pedagogıkalyq ýnıversıteti 1937 jyly qurylǵan. JOO-da 6 fakýltet, joǵary oqý ornynan keıingi bilim berý ınstıtýty, sondaı-aq kásipodaq jumys isteıdi.

Esterińizge sala keteıik, saılaý aldyndaǵy úgit-nasıhat 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada prezıdent saılaýy ótedi.