Meıram Qajyken Aqtóbedegi medıtsına ýnıversıtetinde kezdesý ótkizdi

AQTÓBE. QazAqparat - QR prezıdenttigine kandıdat Meıram Qajyken Aqtóbede Marat Ospanov atyndaǵy Batys Qazaqstan medıtsına ýnıversıtetiniń stýdentteri jáne professor-oqytýshylarymen kezdesti, dep habarlaıdy QazAqparat kandıdattyń shtabyna silteme jasaı otyryp.

Kandıtat alǵashynda óziniń saılaýaldy baǵdarlamasyn tanystyrdy. Sodan soń qatysýshylar da ózderin qyzyqtyrǵan suraqtaryn qoıdy. Olar negizinen áleýmettik saladaǵy máselelerdi sheshý josparyna qyzyǵýshylyq tanytty.

Aqtóbe memlekettik medıtsına ınstıtýty 1957 jyly 1 qyrkúıekte ashyldy. Búgingi tańda ýnıversıtette barlyq bilim berý baǵdarlamalary (bakalavrıat, ınternatýra, rezıdentýra, magıstratýra, doktorantýra), eki murajaı, eki klınıka, medıtsına ortalyǵy, elektrondyq kitaphana bar. Ýnıversıtet óziniń jeke gazeti men aǵylshyn tilindegi jýrnalyn shyǵarady.

Sondaı-aq ýnıversıtet qurylǵan sátten bastap, munda kásipodaq jumys isteıdi. Onyń quramyna qyzmetkerler kásipodaǵy men stýdentter kásipodaǵy kiredi. Olar BQMÝ saıtynda kórsetilgendeı, rektoratpen birge ýnıversıtettiń barlyq ujymy men stýdentteriniń áleýmettik qorǵalýyna úles qosyp keledi.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al 20 qarashada prezıdent saılaýy ótedi.