«Meıirimdiliktiń kóktemgi aptasy» aktsııasy bastaldy

Bul shara  «Bolashaq búginnen bastalady» dep atalatyn respýblıkalyq áleýmettik naýqannyń aıasynda uıymdastyrylyp otyr. Ony Almaly aýdany ákimdigi men «Nur Otan» HDP Almaly aýdandyq fılıaly, QR Azamattyq alıansy, qalalyq aqparattyq-resýrstyq ortalyq, Soǵys ardagerleri men zeınetkerleriniń keńesi birlesip ótkizýde. 11 mamyrǵa deıin sozylatyn bul aktsııa ardagerlerdi qamqorlyqqa alý, áleýmettik qoldaý jáne jastarǵa patrıottyq tárbıe berýdiń ádis-tásilderin jetildirýge baǵyttalǵan. Oǵan partııanyń «Jas Otan» jastar qanatynyń 1 myńnan astam músheleri tartylýda. Olar Almaly aýdanynda turatyn Uly Otan soǵysynyń 304 qatysýshysy men múgedekterine qamqorlyq kórsetip,  soǵys ardagerleriniń esimi berilgen kóshelerdi tazartyp, kógaldandyrady. Sondaı-aq «Jańarǵan qoljazba» dep atalatyn soǵys ardagerleriniń ǵumyrnamalaryn júıege keltirip, jaryqqa shyǵarady. Álııa men Mánshúk monýmentinde «Eske alý vahtasy» ashylyp, Temirbek Júrgenov atyndaǵy Qazaq ulttyq óner akademııasy áskerı-patrıottyq taqyrypta jas sýretshiler kórmesin uıymdastyrady.