«Meıirimdi» qaqpaqtar: Qaraǵandylyqtar qoqys jınaýdy ıgi iske aınaldyrýda

QARAǴANDY. QazAqparat – Qaraǵandy oblysynda erekshe aktsııa bastaldy. Turǵyndar qoldanylǵan plastık bótelke qaqpaqtaryn jınap, ony qaıta óńdeýge jiberedi. Al túsken aqshany qaıyrymdylyqqa baǵyttaıdy, dep habarlaıdy QazAqparat tilshisi.

«Meıirimdi qaqpaq» - qoqysty bólek jınaýǵa jáne kómek kórsetýge baǵyttalǵan joba. Onyń bastamashysy – Qaraǵandy qalasyndaǵy «Radost» qaıyrymdylyq dúkenderiniń basshysy Merýert Arǵymbaeva. Igi bastamany erikti jáne kotokafeniń negizin qalaýshy Inna Radchenko qoldaı tústi.

Joba tek plastıkalyq qaqpaqtardy ǵana emes, sonymen qatar makýlatýra, karton, qatty plastıkti de jınaýdy maqsat etedi.

Búginde aktsııa oblys boıynsha sátti júzege asyrylýda. Jobaǵa osyǵan deıin Temirtaý men Balqash qosylǵan bolatyn. Qaıta óńdeý maqsatynda jınalǵan shıkizat kelisimshart boıynsha «Qaldyqtardy basqarý jónindegi qazaqstandyq operator» JShS qaıta óńdeýge tapsyrylady.

«Biz batareıkalardy jınaımyz. Plastıkalyq qoqys pen qaǵazdyń kóp mólsheri jınalǵannan keıin biz ony qaıta óńdeýge tapsyramyz. Barlyq jınalǵan qarajat qaıyrymdylyqqa jiberiledi. «Radost« dúkenderi erekshe balalarǵa kómektesedi, al biz bul aqshaǵa úısiz janýarlardy zararsyzdandyramyz, emdeımiz, tamaqtandyramyz», - deıdi Inna Radchenko.

Ótken jyly aktsııaǵa «Dobro» dámhanasy qosyldy. Jaz boıy mekemeniń aldynda qaqpaqtardy jınaýǵa arnalǵan chemodan turdy. Bul ıdeıany kóptegen qalalyq mektepter, onyń ishinde №95 jáne №63 orta mektepter qabyldady. Saran jáne Shahtınsk qalalarynyń oqýshylary plastıkalyq qoqys jınaýda belsendilik tanytady.

«Jıynǵa jeke fırmalar da, memlekettik kompanııalar da qatysyp otyrǵany óte jaqsy. Jaqynda JEO-3 bizge kóptegen qaqpaqtardy alyp keldi. Keńselerden qajetsiz bankalar men qaqpaqtar alyp kelip, tapsyrady. Aı saıyn bizge 200 kelige deıin plastık kelip túsedi. Demek, bul plastık tastalmaı, jaqsy isterge baǵyttalady», - deıdi «Ý ryjego kota» kotokafesiniń jetekshisi.

Inna Radchenkonyń aıtýynsha, jobanyń maqsaty muqtaj jandarǵa aqsha jınaý ǵana emes (qaıtalama shıkizatqa baǵa tómen), bastysy - qoqysty bólek jınaý mádenıetin qalyptastyrý bolyp tabylady. Oblys turǵyndaryna qoqysty qaıta óńdeýge, sondaı-aq ony bólek jınaýǵa bolatynyn jáne kerek ekenin jetkizý mańyzdy. Sebebi kishkentaı ádetterden úlken ister bastalady. Jáne bul óte qyzyqty! Kotokafede tipti doıby ornyna qaqpaqtardy qoldanyp, chempıonat uıymdastyrylǵan.

Eger Siz «Meıirimdi qaqpaq» aktsııasyna qatysqyńyz kelse, taza plastıkalyq qaqpaqtardy jáne sútten, shyrynnan, tis pastasynan, sýdan qalǵan qatty plastıkti «Kotokafege» tapsyrsańyz bolady. Mekenjaıy: Qaraǵandy qalasy, Erýbaev kóshesi, 50.