Meıirimdi aýyldastar: Túrkistan oblysynda muqtaj jandarǵa kómek kórsetildi
10:26, 10 Sáýir 2020
TÚRKІSTAN. QazAqparat - Túrkistan oblysynda «Meıirimdi aýyldastar» chellendji aıasynda muqtaj jandarǵa kómek kórsetildi, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, aımaqta koronavırýs ınfektsııasynyń keń taralýynyń aldyn alý úshin el aýmaǵynda tótenshe jaǵdaı jarııalanyp, kóptegen salalar men adamdardyń júris-turystaryna shekteýler qoıyldy.
Osyǵan oraı, túrkistandyqtar oblys aýmaǵynda turatyn qart kisiler men turmysy tómen kóp balaly otbasylarǵa azyq-túlik, kerek-jaraqtaryn alyp berip, kómek qoldaryn sozýda. «Meıirimdi aýyldastar» chellendji aıasynda atqarylyp jatqan qaıyrymdylyq sharalaryna kásipkerler, eriktilermen qatar aýdan, qalalardyń belsendi jastary atsalysýda.
Atap aıtqanda, Otyrar aýdanynyń erikti jastary jergilikti kásipkerlermen birlesip, 5 otbasyny azyq-túlikpen qamtamasyz etip, úı sharýalaryna kómektesti. Shardara aýdandyq «Jastar resýrstyq ortalyǵy» qyzmetkerleriniń uıymdastyrýymen aýdan aýmaǵyndaǵy qart kisilerge medıtsınalyq qural-jabdyqtar men bir rettik azyq-túlikter jetkizildi. Báıdibek aýdanynyń kásipkerleri eldimekenderdegi áleýmettik az qamtylǵan 300 otbasyǵa 17,5 tonna un men 1,75 tonna kúrish, 1.75 tonna ósimdik maıyn taratýda.
«Qıyn kezeńde biz sııaqty qarııalar men muqtaj otbasylarǵa qol ushyn sozý - azamattyq is. Bul - birliktiń aıqyn kórinisi», - degen Qazyǵurt aýdanynyń aqsaqaly Satybaldy Álıev qaıyrymdy jandarǵa rızashylyǵyn bildirdi.
Bul chellendj oblystyń barlyq aýdan, qalalarynda jalǵasyn taýyp, halyqtyń qıyn kezeńnen aman-esen ótýine oń yqpalyn tıgizýde.