Metıl-tret-býtıl efırin óndirý zaýyty paıdalanýǵa sátti engizildi
Jobany «Shymkent hımııalyq kompanııasy» JShS («ShHK» JShS) júzege asyrady. Jańa kásiporynnyń óndiristik qýaty jylyna 57 myń tonna MTBE quraıdy, bul oǵan ishki naryqtyń qajettilikterin tolyǵymen jabýǵa múmkindik beredi.
«ShHK» JShS zaýytyn resmı iske qosý qazaqstandyq munaı-hımııa salasynyń sapaly jańa deńgeıge kóshýiniń bastamasy bolady, óıtkeni kásiporyn jańǵyrtylǵan Shymkent munaı óńdeý zaýytynda (ShMÓZ) munaı-gaz hımııasy shıkizatyn óńdeý tereńdigin eleýli dárejede arttyrýǵa múmkindik beredi. Endi, óńirde etıldenbegen avtomobıl benzınderin alý kezinde paıdalanylatyn quramynda ottegi bar negizgi joǵary oktandy komponentterdiń biri – MTBE óz óndirisi jolǵa qoıylǵandyqtan, munda evro-4 jáne evro-5 ekologııalyq klasty otyn óndiriledi.
«Avtomobıl benzınderine qoıylatyn ózekti ekologııalyq jáne paıdalaný talaptary MÓZ ónimderi sapasynyń joǵary standarttaryn aıqyndaıdy. Munda MTBE sııaqty biregeı qospalar mańyzdy ról atqarady, olar benzınderdiń oktandyq sanyn arttyrady jáne otynnyń tolyq janýyna yqpal etedi. Bizdiń zaýyttyń iske qosylýymen Qazaqstan oktan kóteretin qospalardyń ishki naryǵynyń qajettiligin tolyq óteıdi, al bul jylyna shamamen 80 myń tonna, jáne otandyq MÓZ óziniń básekege qabilettiligin qoldaýǵa, álemdik deńgeıdegi ekologııalyq taza avtobenzınderdi óndirý tehnologııasyn jasaýǵa múmkindik beredi», - dep bólisti «ShHK» JShS Bas dırektory Manat Bıbasov.
Onyń aıtýynsha, búgingi tańda jańa zaýyt ónimderiniń basty tutynýshysy ShMÓZ bolyp tabylady. Qazir barlyq óndiristik protsester jolǵa qoıyldy, munaı-hımııa óndirisine lıtsenzııa alyndy. Kásiporyn QR munaı-hımııa salasynyń ónerkásiptik tutynýshylarynyń tizbesine engizilgen.
Esterińizge sala keteıik, zaýyttyń qurylysy 2019 jyly bastaldy, ony jobalaý kezinde MTBE óndirisi boıynsha ozyq quzyretterge ıe halyqaralyq kóshbasshylardyń biri bolyp tabylatyn AXENS frantsýz kompanııasynyń álemge áıgili Etherification tehnologııasy qoldanyldy.
Zaýyt qurylysy, jabdyqtardy satyp alý Qazaqstan Damý Bankiniń qaryz qarajaty esebinen júzege asyryldy, ol Qazaqstan Respýblıkasyn ındýstrııalyq-ınnovatsııalyq damytýdyń memlekettik baǵdarlamasy aıasynda 10 jylǵa deıingi merzimge 9 mlrd teńge mólsherinde qarjylyq qoldaý kórsetti. Jobanyń jalpy quny 13,7 mlrd teńgeni qurady, osylaısha qalǵan bóligin 4,7 mlrd teńge kóleminde «ShHK» JShS óz qarajaty esebinen saldy.
«Shymkent hımııalyq kompanııasy» JShS zaýytyn paıdalanýǵa berý –óńir úshin ǵana emes, jalpy el úshin de mańyzdy oqıǵa, óıtkeni kásiporyn elimizdiń munaı-gaz hımııasy salasyn damytýda negizgi ról atqarady. Endi Qazaqstanda elimizde óndirilgen otynnyń energetıkalyq qaýipsizdigi men básekege qabilettiligin saqtaýdy qamtamasyz etetin biregeı ónim óndirisi jolǵa qoıyldy», - dep atap ótti QDB Basqarma tóraǵasynyń orynbasary Dýman Áýbákirov.
«ShHK» JShS zaýyty 150-den astam qazaqstandyqty turaqty jumys oryndarymen qamtamasyz etti, zaýyt qurylysy barysynda shamamen 750 adam jumyspen qamtyldy.
«Qazaqstannyń Damý Banki» AQ (QDB) – 2001 jyly qurylǵan Qazaqstan ekonomıkasynyń shıkizattyq emes jáne ınfraqurylymdyq sektorlaryn jańǵyrtý jáne damytý jónindegi ulttyq damý ınstıtýty. Qyzmetiniń negizgi baǵyttary: óndiristik ınfraqurylymdy jáne óńdeýshi ónerkásipti damytý, el ekonomıkasyna járdemdesý jáne syrtqy jáne ishki ınvestıtsııalardy tartý. QDB údemeli ındýstrııalyq-ınnovatsııalyq damý memlekettik baǵdarlamasynyń (ÚIID MB) iri ınvestıtsııalyq operatorlarynyń biri bolyp tabylady. (www.kdb.kz, facebook.com/kdb.kz).
«Shymkent hımııalyq kompanııasy» JShS – 2016 jyldyń ortasynda qurylǵan jobalyq kompanııa, «ALMEKS» Holdıngtik tobynyń quramyna kiredi, «ALMEKS Proekt» JShS jáne «Delta Oil» JShS-nyń menshigi bolyp tabylady. Profıldik sala – óńdeýshi ónerkásip, atap aıtqanda kompanııa munaı óńdeý ónimderin óndirýmen aınalysady.