Metapnevmovırýs: Mektepterde shekteý engizile me

<p>ASTANA. KAZINFORM &mdash; Oqý-aǵartý mınıstri Ǵanı Beısembaev Qazaqstanda metapnevmovırýstyń taralýyna baılanysty mektepterde shekteýler engizý týraly suraqtarǵa jaýap berdi.</p>

— Bizdiń eldiń bilim berý júıesi kez kelgen syn-qaterge daıyn ekenin kórsetip otyr. Bul pandemııa kezinde jınaqtalǵan tájirıbeniń nátıjesi. Barlyq kolledjder men mektepter mundaı jaǵdaılarda qajetti quraldarmen tolyq jabdyqtalǵan. Degenmen, Densaýlyq saqtaý mınıstrliginiń sheshimin kútý qajet dep oılaımyn. Eger sheshim qabyldansa, biz árdaıym qıyndyqtarǵa daıynbyz, — dedi Ǵanı Beısembaev Úkimettegi brıfıngte.

Óz kezeginde Premer-mınıstrdiń orynbasary Tamara Dúısenova Densaýlyq saqtaý mınıstrligi Dúnıejúzilik densaýlyq saqtaý uıymyna (DDSU) suraý salǵanyn atap ótti.

— DDSU bizge alańdaýǵa negiz joq ekenin jetkizdi. Bul vırýs uzaq ýaqyttan beri elderde aınalymda júr, ony emdeý joldary bar. Profılaktıkalyq sharalardy júrgizý qajet. Biz osyǵan súıenemiz. Bul kezeńdi birge eńserýimiz kerek, — dedi ol.

Aıta keteıik, metapnevmovırýs Qazaqstanda da taralyp jatyr.