Metapnevmovırýs: Qazaqstanda karantın jarııalanýy múmkin be

<p>ASTANA. KAZINFORM &ndash; Elimizdegi metapnevmovırýs indetiniń taralýyna qatysty Densaýlyq saqtaý mınıstrligi qoǵamdyq densaýlyq saqtaý ulttyq ortalyǵynyń basqarma tóraǵasy Aıjan Esmaǵambetova túsinik berdi.</p>

- Qazir elimizde epıdemıologııalyq jaǵdaı turaqty. Ótken jylmen salystyratyn bolsaq, syrqattaný 20 paıyzǵa tómendedi. Degenmen, ádette, derttiń órshýi qańtarda baıqalady, sodan aqpannyń ortasyna qaraı tómendeıdi. Qazir karantın nemese shekteý sharalaryn engizýge negiz joq. Biz epıdemıologııalyq jaǵdaıdy, vırýstyń jıiligi men aınalymyn kúndelikti baqylap otyrmyz. Vırýstyq ınfektsııalar, tumaý nemese basqa ınfektsııalardyń ózi qaýipti emes, al asqynǵan jaǵdaıda qaýipti, - dep túsindirdi Aıjan Esmaǵambetova.

Basqarma tóraǵasynyń aıtýynsha, metapnevmovırýs basqa da ınfektsııalar sekildi asqynýy múmkin.

- Kópshilik jerden aýlaq bolǵan jón, maska taqqan abzal jáne bólmeni jeldetip otyrǵan durys. Vırýstyń aldyn alý jáne ınfektsııa juqtyratyn adamdardyń sanyn kóbeıtpeý úshin taǵy bir mańyzdy usynys, JRVI belgileri bar balalardy balabaqshaǵa, mektepke jibermeý kerek. Óıtkeni balalar ınfektsııany otbasyna alyp keledi, sosyn ata-ana, otbasy múshelerine juqtyrý qaýpi bar, - deıdi A.Esmaǵambetova.

Aıta keteıik, elimizde metapnevmovırýsy taralyp jatyr. 

Búgin Úkimet otyrysynan keıin Oqý-aǵartý mınıstri Ǵanı Beısembaev metapnevmovırýstyń taralýyna baılanysty mektepterde shekteýler engizý týraly suraqtarǵa jaýap berdi.