Metallýrgterge kásibı merekesinde memlekettik nagradalar tabystaldy
Mańyzdy mamandyq ıelerine memleket tarapynan dál osyndaı erekshe nazardyń bolýy – el Prezıdenti Qasym-Jomart Toqaevtyń «Eńbek adamy – el baılyǵy» degen sóziniń aıqyn kórinisi.
Eńbek adamy týraly sóz qozǵaǵanda, oıǵa Qarmet metallýrgııa kombınatynyń ardageri Aleksandr Berg keledi. Eńbek jolyn 1956 jyly Qazaq metallýrgııa zaýytynyń elektrotsehynda elektroslesar bolyp bastaǵan ol, metallýrg mamandyǵynyń barlyq satylarynan ótti. Al, zeınetke shyǵar aldynda suryptaý-ılemdeý óndirisiniń óndiristik bólimin basqardy. Kombınattaǵy jas mamandarǵa ári aqylshy, ári ustaz bola bilgen ardager beıneti men zeıneti qatar júretin metallýrgııa salasynyń talaı úzdik mamanyn da tárbıelep shyǵardy.
Áke izin jalǵaǵan uldary Alekseı men Andreı de joǵary tehnıkalyq oqý ornyn «Qara metaldar metallýrgııasy» mamandyǵy boıynsha bitirdi. Jas mamandar esh oılanbastan ınstıtýttan keıin birinshi marten tsehyna jumysqa kelip, kombınatta eńbek joldaryn bastady.
Qazir Alekseı Ystyq myryshtaý jáne alıýmındeý tsehynyń bastyǵy bolsa, Andreı Bolat departamentiniń óndiris jónindegi dırektory. Metallýrgter áýletiniń jalpy eńbek ótili 100 jyldan asatynyn erekshe ataý kerek.
Sondyqtan, memlekettik nagradaǵa laıyq dep tanylǵan «Qarmet» aktsıonerlik qoǵamy, «Kazakhmys Smelting», «Sary Qazyna», «Koýnrad» mys kompanııasy» jaýapkershiligi shekteýli seriktesteriniń 49 eńbekkeri qatarynda Aleksandr Bergtiń de bolýy – zańdy. Bul – kúsh-jigermen qatar, minezdiń qaırattylyǵyn da qajet etetin metallýrg mamandyǵyna degen erekshe qurmettiń belgisi. Bul – eńbekpen tapqan nannyń tátti ekenin uǵynǵan «eńbek adamyna» degen laıqyty marapat ekeni sózsiz.
Qıyn da abyroıly mamandyqtyń abyroıyn asqaqtatqan eńbekkerlerdiń segizi «Qurmet» ordenimen, 14 adam ІІІ dárejeli «Eńbek Dańqy» ordenimen marapattaldy. Al, jıyrma metallýrg «Eren eńbegi úshin» medalimen, jeteýi Qazaqstan Respýblıkasy Prezıdentiniń Qurmet gramotasymen marapattaldy.
Qaraǵandy oblysy «bolattan bulaq aǵyzǵan» metallýrgterge kende emes. Áste, jalynda janylǵan jandardyń eńbegin moıyndap, Memleket basshysynyń Jarlyǵymen otandyq metallýrgııa salasyndaǵy jemisti eńbegi, eldiń ónerkásiptik jáne ınfraqurylymdyq damýyna qosqan úlesi úshin berilgen memlekettik nagradalar sol jandardyń eren eńbegin moıyndaý bolmaq.
– Bizdiń aımaq Qazaqstannyń taý-ken metallýrgııalyq astanasy bolyp sanalady. Bul sala qyzmetkerleri men ardagerleriniń eńbegi zor, – dedi Qaraǵandy oblysynyń ákimi Ermaǵanbet Bólekpaev Temirtaýda Memleket basshysynyń atynan nagradalardy tabystaý sátinde.
«Qurmet» ordeniniń ıegeri Vladımır Fılıppov kombınatta jarty ǵasyrǵa jýyq eńbek etip keledi. Eńbek jolyn qarapaıym jumysshydan bastaǵan ol qazir josparlaý jáne jedel basqarý jónindegi dırektor.
– Mektepten keıin ákem meni kombınatqa alyp keldi. Al, úsh jyl áskerı boryshymdy ótegennen keıin kombınatqa qaıta oraldym. Áýelde, úzdiksiz óńdeý qondyrǵylaryn basqarý postynyń operatory retinde qabyldandym. Oqýdan da qol úzbedim. Jumys jasaı júrip, ýnıversıtettiń keshki bóliminde oqydym, – deıdi Vladımır Fılıppov.
Ómirin metallýrgııa salasymen baılanystyryp, qıyndyqtan qashpaǵan, bolattaı shyńdalǵan eńbek adamdaryna qarap, Ermaǵanbet Qabdýlaulynyń «Temirtaýdaǵy ár otbasy, ár turǵyn Qazaqstan Magnıtkasynyń damýyna óz úlesin qosyp keledi» degen sóziniń ras ekenine kóziń jetkendeı bolady.
Qalanyń «Temirtaý» atalýynyń ózi dál osy jerde Qazaqstannyń qara metallýrgııasynyń paıda bolǵany jaıly tarıhı faktini rastaıdy emes pe?!
Resmı málimetter metallýrgııa óndirisinde 100 myńǵa jýyq adam eńbek etetinin kórsetedi. Osyndaı bolat minezdi adamdardyń arqasynda metallýrgııa elimizdiń iri ári jetekshi salalarynyń biri.
Odan bólek, Qazaqstan taý-ken ónerkásibi salasyndaǵy jetekshi 15 eldiń qataryna kiredi. Búginde elimizde tústi metallýrgııa da órkendep, qanatyn keńge jaıyp keledi. Bul halyqaralyq naryqqa mys, alıýmınıı, myrysh, qorǵasyn sııaqty túrli metaldardy eksporttaýǵa múmkindik berip otyr.