Meta Eýroparlament saılaýy qarsańynda jasandy ıntellekti teris paıdalanýmen kúresetin top qurady

<p>ASTANA. KAZINFORM &ndash; Meta Eýroparlament saılaýy qarsańynda jalǵan aqparatpen jáne generatıvti jasandy ıntellektti teris paıdalanýmen kúresý úshin arnaıy top qurady. Bul jaǵdaı saılaýǵa aralasýǵa jáne JI jasaǵan jańylystyratyn mazmunnyń taralýyna qatysty alańdaýshylyqqa baılanysty oryn alǵan, dep habarlaıdy <a href="https://www.reuters.com/technology/meta-set-up-team-counter-disinformation-ai-abuse-eu-elections-2024-02-26/#:~:text=BRUSSELS%2C%20Feb%2026%20(Reuters),and%20misleading%20AI%2Dgenerated%20content" target="_blank" rel="noopener">Reuters</a>.</p>

Suraýlarǵa jaýap retinde mátindi, sýretterdi jáne beınelerdi sekýndtarda jasaı alatyn JI-dyń qarqyndy damýy alańdaýshylyq týǵyzýda, óıtkeni ony bıyl búkil álemde saılaýǵa aralasý úshin paıdalanýy múmkin.

Eýroparlamentke saılaý 6-9 maýsym aralyǵynda ótedi.

«Saılaý jaqyndaǵan saıyn biz yqtımal qaýipterdi anyqtaý jáne naqty ýaqyt rejıminde azaıtý sharalaryn qabyldaý úshin Saılaý boıynsha jedel ortalyqty (Elections Operation Center) iske qosamyz», - dedi EO-nyń Meta-daǵy isteri bóliminiń basshysy Marko Panchını. 

Onyń aıtýynsha, kompanııanyń derekter ǵylymy, ınjenerııa, zertteý, kontent saıasaty jáne zań sııaqty ártúrli bólimsheleriniń sarapshylary jalǵan aqparatpen kúresýge, yqpal etý operatsııalaryna qarsy turýǵa jáne JI-dy durys paıdalanbaýmen baılanysty táýekelderdi sheshýge nazar aýdarady.

Onyń aıtýynsha, Meta qazirgi ýaqytta Eýropalyq Odaq boıynsha 26 táýelsiz faktchekıng uıymdarymen jumys isteıdi jáne Bolgarııa, Frantsııa, Slovakııa elderinde úsh jańa seriktesti qosýdy josparlap otyr.

Osy aıda Meta, Microsoft, OpenAI jáne basqa 17 tehnologııalyq kompanııa búkil álem boıynsha saılaýǵa áser etýi múmkin aldamshy JI arqyly jasalǵan mazmunnyń taralýyn boldyrmaý úshin birlesip jumys isteýge kelisti.