Meshitterde jınalǵan qarajat qaıda jumsalady – Bas múftı jaýaby

ASTANA. QazAqparat – Ortalyq kommýnıkatsııalar qyzmetinde ótken brıfıngide Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly pitir sadaqadan meshitterge jınalǵan aqsha qaıda jumsalatynyn túsindirdi, dep habarlaıdy QazAqparat tilshisi.

«Jalpy pitir sadaqasy ár meshitke jeke-jeke túsedi. Bir jerge ǵana túspeıdi ǵoı. Qazaqstanda qazir 2700-den astam meshit bar. Turǵyndar ózderi turyp jatqan jerdegi meshitterge jeke-jeke beredi. Árıne, bir qalaǵa nemese meshitke qatysty málimet kerek bolsa, onyń esebin kórýge bolady jáne suraǵan adamdarǵa berýge de bolady. Naıb múftı Sansyzbaı Qurbanuly aıtyp ketkendeı, túken sadaqalar jyl boıy muqtaj jandarǵa berilip otyrady», - dedi Bas múftı BAQ kióiliniń saýalyna bergen jaýabynda.

Sondaı-aq ol meshitten kómek surap kelgen adamǵa járdem berilmeıtin jaıttar sırek kezdesetinin, onyń ózi qarjylyq múmkindiktermen ǵana baılanysty ekenin aıtty.

«Árıne keı kezde jaǵdaılar bolýy múmkin. Keı meshitterde múmkindigi bolmaı, qarajat máselesi bolýy múmkin. Biraq bul óte az. Óıtkeni bizdegi ár meshittiń tizimi bar. Bir aýyldyń meshiti bolsa, sol aýyldaǵy jaǵdaıy tómen otbasylardyń tizimi meshitte saqtalady. Olarǵa ýaqtyly kómekter berilip turady», - dedi Naýryzbaı qajy Taǵanuly.