Merzimdi qyzmet sarbazdaryna joǵary oqý ornynda tegin oqýǵa 1500 grant bólindi

<p>ASTANA. KAZINFORM &ndash; Bilim berý granttaryn bólý rásiminiń ashyq ótýin Qorǵanys, Tótenshe jaǵdaılar mınıstrlikteri jáne Ulttyq ulan ókilderinen quralǵan komıssııa qadaǵalady.</p>

Qorǵanys mınıstriniń orynbasary general-maıor Shaıh-Hasan Jazyqbaev 2025 jyldyń 1 qańtarynan bastap bilim berý jeńildikterin alý jóninde jańa talaptar paıda bolatynyn málimdedi. Eki beıindik pán boıynsha testileý qosylady. Budan ózge memlekettik grant berilgen sarbazdar shákirtaqy alatyn bolady. Olarǵa oǵan qosa, alǵashqy oqý jyly stýdenttik jataqhanaǵa ornalastyrýǵa basymdyq beriledi.

2023 jyly kúzde áskerge shaqyrylǵan merzimdi qyzmettiń 17 927 sarbazy tegin oqýǵa bir jarym myń oryndy bólý rásimine qatysty. Konkýrsqa Qorǵanys mınıstrliginen – 8 169, Ulttyq ulannan – 6 441, TJM – 315, Shekara qyzmetinen – 2 715, Memlekettik kúzet qyzmetinen – 287 sarbaz qatysty.

Іrikteýdiń ashyqtyǵyn «Srochnıkı 2.0» aqparattyq júıesi qamtamasyz etti, onda kúsh qurylymdarynyń 161 áskerı bólimi qyzmettiń barlyq kezeńinde sarbazdardyń úlgerimi men tártibi boıynsha nátıjeler engizdi.

Árbir áskerı qyzmetshige úsh joǵary oqý ornyn tańdaýǵa bolady. Olardyń arasynda jastardyń eń úlken qyzyǵýshylyǵyn týdyrǵan Ál-Farabı atyndaǵy Qazaq ulttyq ýnıversıteti, NARXOZ, Astana IT University, L. N. Gýmılev atyndaǵy Eýrazııa ulttyq ýnıversıteti, M. Áýezov atyndaǵy Ońtústik Qazaqstan ýnıversıteti boldy. Áskerı joǵary oqý oryndaryna túsýge 1031 sarbaz ótinish berdi.

Bólý rásimi áskerı qyzmetshilerdiń reıtıngine qaraı kúsh qurylymdarynyń úsh bazasy boıynsha avtomatty túrde iske asyryldy.

Qorǵanys mınıstriniń keńesshisi Aıgúl Tólembaevanyń aıtýynsha, jobany iske asyrýdyń barlyq kezeńinde 4500 sertıfıkat berilgen. Osy jyldyń qyrkúıek aıynan bastap 1039 merzimdi qyzmet sarbazy oqýǵa kiristi, olardyń 581-i tegin oqý grantyn paıdalandy. Qalǵan azamattar joǵary oqý oryndaryna UBT-syz aqyly bólimge tústi. 2023 jyly oqýǵa 615 sarbaz qabyldandy, olardyń 189-y aqysyz oqıdy.

Áskerde bolǵan sarbazdar úshin taǵy bir artyqshylyq bar. Stýdenttiń qalaýymen ol zapastaǵy ofıtser baǵdarlamasy boıynsha áskerı kafedraǵa konkýrssyz qabyldanady, ıaǵnı onda ol tegin oqı alady. Búgingi tańda áskerı kásipti tańdaǵan 20-dan asa adam áskerı kafedraǵa tústi.

Grant ıeleriniń tizimderi áleýmettik jelilerde jarııalanyp, elimizdiń joǵary oqý oryndaryna jiberiledi. Memlekettik granttar sııaqty sertıfıkattar da aýystyrý múmkindiginsiz QR-kodpen qalyptastyrylady.

Budan bólek, platformaǵa sońǵy úsh jyl ishinde áskerge shaqyrylǵan 83 385 sarbaz tirkelgenin atap ótelik.