Merziminen buryn parlamenttik saılaýǵa negiz joq - senator Gromov

ASTANA. QazAqparat - Parlamentte merziminen buryn saılaý ótkizý qarastyrylyp otyrǵan joq. Bul jaıynda QR Prezıdentiniń bılik tarmaqtary arasynda ókilettilikterdi qaıta bólý bastamasy boıynsha pikir bildirgen Senat tóraǵasynyń orynbasary Sergeı Gromov málim etti, dep habarlaıdy QazAqparat.

«Merziminen buryn saılaý ótkizý úshin qandaı negiz bar? Menińshe, eshqandaı da sebep joq. Úkimet otstavkasy jarııalanbady, óz kezeginde Parlament Úkimetke senimsizdik tanytpady. Búginde ókilettikterdi qaıta bólý boıynsha konstıtýtsııalyq ózgerister saılaýdy jarııalaý úshin túpkilikti ózgeristi meńzep turǵan joq. Qandaı da bir saılaý jasaýǵa  eshqandaı da bir maqsattylyqty kórmeı otyrmyn. Sondyqtan qazirgi tańda mundaı qadam úshin qajettilik bolmaı tur», - dedi Gromov.

Budan bólek ol ókilettikterdi bólý máselesine toqtaldy. Depýtattyń paıymynsha, búginde Prezıdentten Parlamentke beriletin ókilettikter laıyqty qadamdar bolyp otyr jáne parlamentarııler oǵan daıar.

«Al Úkimetke qosymsha ókilettik berilse, mınıstrler kabıneti jaýapkershiliktiń artqanyn sezinedi, sondaı-aq ony mindetti oryndaýǵa jaýapty bolady», - dedi ol tilshiler saýalyna jaýap berý kezinde.

Sonymen qatar Gromov eki palatadan turatyn Parlament bıiliktiń eń ońtaıly tarmaǵy ekenin atap ótti.

«Qos palata zańdardyń sapaly túrde qabyldanýyn qamtamasyz etedi. Atap aıtqanda,  tómengi palata eskermegen jaǵdaılardy joǵary palata túzete alady. Sondyqtan zańdar sapaly bolyp, halyqqa qyzmet etýi úshin taǵy bir súzgish retinde osyndaı joǵary palata qajet», - dedi ol.