Merzimdi áskerı qyzmetshiler Arystaǵy jumysqa tartylǵan joq – Nurlan Ermekbaev

NUR-SULTAN. QazAqparat – Merzimdi áskerı qyzmetshiler Arys qalasy polıgonyndaǵy jumysqa tartylmaıdy. Qorǵanys mınıstri Nurlan Ermekbaev Úkimet otyrysynan keıin tilshilerge bergen suhbatynda osylaı dedi, dep habarlaıdy QazAqparat tilshisi.

«Joǵarǵy Bas Qolbasshynyń bizge bergen tapsyrmasy bar. Oq-dárilerdi tezirek alyp shyǵý maqsatyndaǵy memlekettik qajettilik, Arys qalasy turǵyndarynyń talaptary barshylyq. Biz bul baǵytta jumys júrgizip jatyrmyz», - dedi Nurlan Ermekbaev.

Onyń aıtýynsha, qazirgi ýaqytta Arystaǵy jaǵdaıdy retke keltirý úshin 700 áskerı qyzmetshi jumyldyrylǵan.

«Biz ol jaqqa merzimdi áskerı qyzmetshilerdi tartpaımyz. Onda biliktiligi joǵary, daıyndalǵan saperler, ınjenerler men áskerı polıtseıler ǵana barady. Barlyǵy da - kelisimshart boıynsha qyzmettegiler», - dedi ol.

Sonymen birge mınıstr qalany oq-dáriden tazartý jumystaryn tek mamandanǵan áskerıler júrgize alatynyn málim etti.

«Bul álbette, qaýipti jumys. Arys qalasynyń tynyshtyǵyn saqtap, tapsyrmany oryndaý úshin áskerı qyzmetshiler sanaly túrde táýekelge baryp júr. Áskerı qyzmetshilerden basqa eshkim bul jumysty atqara almaıdy. Bul úshin, taǵy da aıta keteıin, daıyndyǵy myǵym áskerı mamandar tartylǵan. Dál qazirgi ýaqytta qala turǵyndaryna tikeleı qaýip joq. Qala tolyǵymen tazartylǵan. Negizgi jumys jarylys bolǵan áskerı bólim aýmaǵynda júrgizilýde», - dedi ol.

Eske sala ketsek, buǵan deıin Qorǵanys mınıstri Nurlan Ermekbaev Arys mańynda jarylystan qaza tapqan áskerı qyzmetshiniń týǵan-týystaryna kóńil aıtqan bolatyn.