Merzimdi áskerı qyzmetke shaqyrýdyń kúzgi naýqany bastaldy

NUR-SULTAN. QazAqparat - Búgin, birinshi qyrkúıekte áskerge shaqyrý naýqany bastaldy. Ol osy jyldyń sońyna deıin jalǵasady. Osy ýaqyt ishinde Qarýly Kúshterdiń, basqa da áskerler men áskerı quralymdarynyń qataryn 18-27 jas aralyǵyndaǵy on jeti myńǵa jýyq jas azamat tolyqtyrady, dep habarlaıdy QR QM baspasóz qyzmeti.

Jergilikti atqarýshy organdar «Áskerı qyzmet jáne áskerı qyzmetshilerdiń mártebesi týraly» QR Zańyna sáıkes azamattardy merzimdi áskerı qyzmetke shaqyrýdy uıymdastyryp, qamtamasyz etedi. Áskerge alynǵan kúnnen bastap 12 aı qyzmet atqarǵan áskerı qyzmetshilerdi zapasqa shyǵarý da josparly tártippen júrgiziledi.

Ekinshi jyl qatarynan áskerge shaqyrý naýqany pandemııa jaǵdaıynda ótýde. Koronavırýsty juqtyrý qaýpin azaıtý úshin áskerge shaqyrylýshylardy habardar etý Tsıfrlyq damý, ınnovatsııalar jáne aeroǵarysh ónerkásibi mınıstrliginiń 1414 qyzmetimen SMS-habarlamalar jiberý arqyly júzege asyrylady.

Vırýstyq ınfektsııadan qosymsha qorǵanys PTR-tekserý bolyp tabylady. Áskerge shaqyrylýshylardy eki ret tekseredi. Áskerge shaqyrý kezinde jınaý pýnktterinde jáne áskerı bólimderge jańa tolyqtyrýlar kelgennen keıin.

– Barlyq suraqtar boıynsha azamattar elektrondyq poshta nemese qorǵanys isteri jónindegi departamentterdiń áleýmettik jelilerdegi resmı akkaýnttary arqyly habarlasa alady. Sybaılas jemqorlyq kórinisteri týraly habarlamalar «Qarýly Kúshter – adaldyq alańy» jobalyq keńselerinde jáne senim telefondary arqyly qabyldanady, – dep túsindirdi Qarýly Kúshter Bas shtaby Uıymdastyrý-jumyldyrý jumystary departamentiniń bastyǵy polkovnık Sáken Júsipov.

Esterińizge sala ketsek, óńirlerdegi áskerge shaqyrý komıssııalaryn oblys, qala jáne aýdan ákimderiniń orynbasarlary basqarady. Olar áskerge shaqyrý komıssııasynyń sheshimimen nemese medıtsına mamandarynyń qorytyndylarymen kelispegen azamattardyń ótinishterin qaraıdy.