Mert bolǵan HAMAS basshysy Ismaıl Hanııa týraly ne bilemiz

<p>ASTANA. KAZINFORM &ndash; HAMAS qozǵalysy saıası bıýrosynyń jetekshisi Ismaıl Hanııa Palestınany táýelsiz el retinde tanýǵa umtylǵan kúshti pragmatık retinde tanymal. Ol Izraılmen atysty toqtatý týraly kelissózderge jaýapty edi.</p>

Ismaıl Hanııa 1962 jyly Gaza qalasynyń soltústigindegi Shatı palestınalyq bosqyndar lagerinde dúnıege kelgen. Onyń otbasy 1948 jyly qazirgi Izraıl aýmaǵynan shyǵaryldy. Ol orta jáne joǵary bilimdi Gazada alǵan, ıaǵnı arab ádebıetin oqyp, keıin HAMAS uıymynyń qataryna qosylǵan.

HAMAS-ta saıası yqpalǵa ıe bola bastady. I. Hanııa HAMAS-tyń rýhanı kóshbasshysy jáne negizin qalaýshy Sheıh Ahmed ıAsınniń jeke hatshysy boldy, ony 2003 jyly Izraıl áskerleri óltirdi.

2006 jyly I. Hanııa saıasatqa bet burdy. Ol resmı saılaýda jeńiske jetip, Palestına avtonomııasynyń Premer-Mınıstri boldy. Alaıda, bir jyldan keıin Gaza sektoryndaǵy saıası partııalardyń ishindegi turaqsyz jaǵdaıǵa baılanysty eki úkimet quryldy. 2007 jyly HAMAS jaqtastary I. Hanııanyń otstavkaǵa ketý týraly jarlyǵyn moıyndaýdan bas tartty, sodan keıin ol jańa mınıstrler kabınetin jınady.

2018 jyly AQSh Memlekettik departamenti ony terrorıst dep tanydy, al 2024 jyldyń mamyrynda Halyqaralyq Sot prokýrory Kárim Han ony tutqyndaýǵa sanktsııa surady. Ol Izraılge shabýylda kisi óltirý, kepilge alý jáne tutqyndarǵa zorlyq-zombylyq kórsetý áskerı qylmystary úshin jaýapty dep tanyldy.

Ismaıl Hanııa jáne onyń otbasy múshelerine birneshe ret qastandyq jasaldy. Onyń ápkesi Gazadaǵy kóshbasshynyń úıine baǵyttalǵan shabýyl kezinde qaıtys boldy. Onyń 13 ulynyń úsheýi basqa áskerı operatsııada ajal qushty.

Sheteldik BAQ I.Hanııanyń jeke baılyǵyn eseptep, 4 mıllıard dollarǵa baǵalap otyr. Olardyń boljamynsha, Hanııa HAMAS-qa kómek úshin jınalǵan qarjy esebinen kólemdi tabys tapqan.

Búgin tańerteń Tegeranda HAMAS basshysy Ismaıl Hanııanyń qaza tapqany týraly habarlaǵan edik.