Merkide koronavırýs juqtyrǵan dárigerdiń shaǵymynan keıin aýdan ákimi jazalandy
Merki aýdandyq ortalyq aýrýhanasyndaǵy rezonansty oqıǵa boıynsha aýdan ákimi Meıirhan Ómirbekovke sógis jarııalandy, al oblystyq densaýlyq saqtaý basqarmasynyń basshysy Marat Jumanqulovtyń jaýapkershiligi karantın rejımi aıaqtalǵannan keıin qaralatyn boldy. Bul týraly oblys ákimi Berdibek Saparbaevtyń tóraǵalyǵymen ótken jıynda qaraldy.
Aıta keteıik, basqosý barysynda tıisti tulǵalar oblysta naýqastarmen jumys isteıtin medıtsına qyzmetkerlerin qorǵanysh kostıýmderimen jáne basqa da jeke qorǵaný quraldarymen qamtamasyz etý jónindegi jumystar jalǵasyn tabatyndyǵyn aıtyp sendirdi.
Oblys ákimi jıynda jergilikti atqarýshy organdar men medıtsınalyq mekemelerdiń basshylaryn azamattardyń ótinishterine, tilekterine jáne synı ótinishterine muqııat nazar aýdarýǵa, áleýmettik jelilerde kóterilgen máselerge jedel den qoıýǵa shaqyrdy.
Basqosýda polıtseılerdiń azamattardyń karantındik talaptardy saqtaýyn qamtamasyz etý jónindegi jumysy týraly polıtsııa departamentiniń bastyǵy Janat Súleımenov baıandady. Ol oblys boıynsha 214 karantındik rejımdi buzý faktisi anyqtalǵanyn, blokpostta jumys isteıtin polıtsııa qyzmetkerleri arasynda ınfektsııanyń bar-joǵyn anyqtaý boıynsha test júrgizý qajettigin atap ótti.
Eske sala keteıik, buǵan deıin koronavırýs ınfektsııasyn juqtyryp alǵan atalǵan aýdandyq aýrýhananyń ınfektsıonıst dárigeri Tolqynaı Ordabaeva áleýmettik jelide ózi qyzmet etetin aýrýhanaǵa qatysty máselelerdi jetkizgen bolatyn. Sodan keıin Jambyl oblysynyń Merki aýdanynda koronavırýs juqtyrǵan dárigerdiń shaǵymy boıynsha tekserý bastaldy.
Sonymen qatar, Nur Otan partııasynyń tekserýinen soń Jambyl oblysynda ákimniń orynbasary men bas dáriger jazalanǵan edi.
Oblys ákiminiń tapsyrmasymen qurylǵan arnaıy komıssııanyń tekserisinen soń Merki aýdandyq aýrýhanasynyń bas dárigeri men onyń orynbasary jumystan bosatylǵan.