Merki aýdanynda 100-den astam joba júzege asyrylyp jatyr

MERKІ. QazAqparat – Jambyl oblysynyń ákimi Berdibek Saparbaev jumys saparymen Merki aýdanyna baryp, jóndeý-qurylys jumystarynyń júzege asyrý barysymen tanysty, - dep habarlaıdy QazAqparat oblys ákimdiginiń resmı saıtyna silteme jasap.

Merki aýdanynda ártúrli memlekettik damý baǵdarlamalary aıasynda 108 jobany iske asyrýǵa 6,1 mıllıard teńge bólindi. Uzyndyǵy 140 shaqyrymdy quraıtyn 147 kósheni jóndeý, bir mektep salý, tórt mektepke kúrdeli, úsh mektepke aǵymdaǵy jóndeý jumystaryn júrgizý josparlanǵan. Sondaı-aq, mádenıet jáne sport, jaryqtaryndyrý, eldi mekenderge sý qubyryn tartý jáne gazdandyrý boıynsha túrli jobalar kózdelgen.

Oblys ákimi aýdandaǵy jumys sapary barysynda birqatar bilim ordalaryn aralady. Atap aıtsaq, «Jumyspen qamtýdyń jol kartasy» baǵdarlamasy aıasynda №11 orta mektebiniń ǵımaratyna kúrdeli jóndeý jáne seısmıkalyq kúsheıtý jumystary júrgizilýde. Mektep irgesi 1976 jyly qalanǵan desek, búginde onyń aıtarlyqtaı tozǵany baıqalady.

«Mektep dırektory tehnıkalyq qadaǵalaýmen birge jóndeý jumystarynyń sapasyn únemi baqylap, kemshilikterdi anyqtap, kórsetip otyrýy tıis. Jańa oqý jylynda balalar zamanaýı jáne jaıly mekteptiń tabaldyryǵyn attaýy tıis», - dedi oblys ákimi.

Granıtogor aýylynda 300-ge jýyq úı bar bolsa, onda 1 200-den astam adam turyp jatyr. №8 aýyl mektebi 1952 jyly salynǵan. 205 bala oqıtyn bir qabatty bilim oshaǵynda ashana, sport jáne akt zaldary joq. Osy máseleni sheshý úshin «Jumyspen qamtýdyń jol kartasy» baǵdarlamasy boıynsha 120 oryndyq jańa mekteptiń qurylysy bastalǵan. Jobanyń quny – 500 mıllıon teńgeden asady.

«Eldi meken sýmen jáne gazben qamtylǵan. Barlyq qajetti kabınettermen, sport jáne akt zaldarymen jabdyqtalǵan jańa mektep salynyp jatyr. Qurylys qarqynyn jedeldetip, jumysqa jergilikti turǵyndardy tartý qajet. Mektep aýmaǵyn abattandyrý men kógaldandyrýǵa erekshe kóńil bólgen durys. Mekteptiń eski ǵımaratyn aýyl turǵyndarynyń ıgiligine tıimdi paıdalaný jaǵyn qarastyryp, usynystar ázirleńizder», - dep atap ótti aımaq basshysy.

Sondaı-aq Berdibek Saparbaev feldsherlik-akýsherlik ambýlatorııa men balalar shaǵyn ortalyǵyn aralap, mektepke deıingi mekeme aýmaǵynyń retsiz kórinisin synǵa aldy.

Jalpy, Merki aýdanynda sýmen jabdyqtaý boıynsha 7 joba júzege asyrylyp jatyr. Sarymoldaev, T. Rysqulov jáne Qostoǵan aýyldaryna taza aýyz sý qubyry tartylyp, Qyzylqystaq, Qazaqdıqan jáne Kentaı aýyldaryndaǵy sý jelileri aǵymdaǵy jóndeýden ótedi.

Jumys saparyn qorytyndylaı kele aımaq basshysy aýdan ákimine jóndeý-qurylys jumystaryn júrgizý barysyn erekshe baqylaýda ustaýdy tapsyrdy.

«Merki aýdany turǵyndarynyń máselesin sheshýge 6 mıllıard teńgeden astam qarjy bólindi. Oǵan avtojoldar men áleýmettik nysandar salý jáne jóndeý, sýmen jabdyqtaý, elektrmen jabdyqtaý jáne gazdandyrý sharalary atqarylady. Merkilikter kóp uzamaı oń ózgeristerdi sezine bastaıdy. Ol úshin bıýdjet qarajatyn utymdy paıdalaný qajet. Bul - memleket qyzmetiniń tıimdiliginiń eń jaqsy kórsetkishi bolmaq», - dep qorytyndylady aımaq basshysy.