«Mereıli otbasy» ulttyq konkýrsynyń jeńimpazyn anyqtaýǵa elimizdiń barlyq azamattary qatysa alady (FOTO)
«Elbasy Nursultan Ábishuly Nazarbaev «Otannyń birligi, otbasynyń birligi», dep atap kórsetip, memlekettiń damýy men Táýelsizdikti nyǵaıtýdaǵy otbasynyń úlken rólin, osy ınstıtýttyń mańyzyn aıtyp ótken bolatyn. Osy oraıda, elimizde úshinshi jyl «Mereıli otbasy» konkýrsy ótkizilip keledi. Qazir osy konkýrsqa qatysýshylar sany edeýir kóbeıdi. Sonymen qatar bul konkýrs ár jerde jergilikti óńirdiń dástúrleri men erekshelikterin kórsetip, ótkizilip jatyr. Búgin bizdiń komıssııa eki týrdan keıingi úshinshi týrǵa qatysatyn otbasylardy qaraımyz», - dedi otyrysty ashqan Memlekettik hatshy.
Aıta keterligi, maýsym aıynda elimizdiń barlyq óńirlerinde ekinshi kezeńniń jeńimpazdaryn marapattaý rásimi ótkizildi. Sonymen birge árbir oblystan, Astana men Almaty qalalarynan úshinshi - ulttyq kezeńge qatysý úshin eki otbasydan anyqtaldy.
Konkýrstyń ulttyq kezeńine daıyndyq aıasynda komıssııa músheleri fınalǵa qatysatyn 16 úmitkerdi belgilep, jeńimpazdarǵa tabystalatyn dıplomdar men músinshilerdiń eskızderin bekitti.
Komıssııa otyrysynyń qorytyndysy boıynsha G.Ábdiqalyqova uıymdastyrý máselelerin jalǵastyrý úshin memlekettik organdarǵa birqatar tapsyrma berdi.
Eskerte keterligi, «Mereıli otbasy» konkýrsynyń jeńimpazyn anyqtaýǵa elimizdiń barlyq azamattary qatysa alady. Daýys berý aǵymdaǵy jyldyń 2-9 qyrkúıegi aralyǵynda kaztube.kz portalynda onlaın daýys berý, 8-803-8000 01, 02, 03.... (otbasynyń nómirine baılanysty) nómiri boıynsha statsıonarlyq telefon arqyly jáne 6284 nómirine otbasynyń nómirin kórsete otyryp, SMS habarlama joldaý arqyly ótkiziledi.