«Mereıli otbasy» Ulttyq baıqaýyna ótinimder qabyldaý aıaqtaldy

NUR-SULTAN. QazAqparat - Elimizdiń óńirlerinde «Mereıli otbasy» Ulttyq baıqaýyna qatysý úshin ótinimderdi qabyldaý aıaqtaldy. Berilgen ótinimder sany otbasylyq qundylyqtardy nasıhattaý qazaqstandyqtar arasynda óte tanymal jáne suranysqa ıe ekenin kórsetti, dep habarlaıdy QazAqparat.

Bıyl jańa erejeler aıasynda «Mereıli otbasy» baıqaýyna qatysý ótinimderin tek otbasylardyń ózderi ǵana emes, bilim berý, densaýlyq saqtaý, mádenıet uıymdary, eńbek ujymdary, ónerkásiptik kásiporyndar, ÚEU jáne basqa da zańdy tulǵalar bergenin atap ótý kerek.

Engizilgen ózgeristerdiń arqasynda óńirlik komıssııalarǵa barlyǵy 2768 ótinim, onyń ishinde otbasylardan – 1692, zańdy tulǵalardan - 1076 kelip tústi.

Ótinimderdiń eń kóp sany - Almaty (454), Shyǵys Qazaqstan (232) jáne Qaraǵandy (223) oblystarynda.

«Mereıli otbasy» Ulttyq baıqaýynyń laýreaty ataǵy qyrkúıek aıynda Otbasy kúni qarsańynda Qazaqstannyń barlyq óńirlerinen kelgen 17 úzdik otbasyǵa beriletin bolady. Máselen, buryn respýblıkalyq deńgeıde bir ǵana otbasy jeńiske jetken. Aǵymdaǵy jyldan bastap óńirlik deńgeıde jeńimpaz atanǵan barlyq 17 otbasyǵa konkýrs laýreaty ataǵy berilip, teń marapattar beriletin bolady.

Budan basqa, bıyldan bastap konkýrsqa qatysýǵa ótinim berý, konkýrs nátıjeleri boıynsha marapattaý, konkýrs qorytyndylaryn anyqtaý jónindegi komıssııa quramyna azamattyq qoǵam ókilderi ǵana emes, sonymen qatar baıqaýdyń burynǵy jeńimpazdary da kirdi; jeńimpazdardy anyqtaý men baǵalaýdyń jańa baldyq júıesi boıynsha sharttyq ózgerister engizildi.

Esterińizge sala keteıik, Ulttyq baıqaýdy Elbasy N.Á. Nazarbaev 2013 jyldyń jeltoqsanynda bekitken bolatyn. Osy ýaqyt ishinde «Mereıli otbasyǵa» 15 myńnan astam otbasy qatysty.