Mereıli otbasy: Tarazda dárigerlik stajy 150 jylǵa jýyqtaǵan áýlet jeńimpaz boldy
Igi sharaǵa oblys ákimi Berdibek Saparbaev qatysty.
«Qazaqta «Uıada ne kórseń, ushqanda sony ilesiń» degen qanatty sóz bar. Ár ulttyń, ár memlekettiń bolashaq damýy otbasyndaǵy tárbıeden negiz alady. Osydan 7 jyl buryn Elbasy Nursultan Nazarbaev «Mereıli otbasy» ulttyq baıqaýyn ótkizý týraly bastama kótergen bolatyn. Sodan beri dástúrli túrde ótip kele jatqan «Mereıli otbasy» ulttyq baıqaýynyń ár shańyraqqa berer taǵylymy mol. Atalǵan otbasylyq dodaǵa jambyldyqtar da belsene qatysýda. Osy jyldar ishinde atalǵan baıqaýǵa bizdiń óńirden 1200 otbasy qatysyp, baqtaryn synaǵan. Osy otbasylardyń belsendiligine qarap, taǵy myńdaǵan jas shańyraqta bereke men birliktiń, baqyt pen tatýlyqtyń shamy janǵany anyq. Bıyldyń ózinde 202 otbasy qatysqan eken. Onyń deni - kópbalaly otbasylar. Óńirimizde 36 myńnan astam kópbalaly otbasy bar. Memleket tarapynan olarǵa úzdiksiz qoldaýlar kórsetilip keledi. Elimizdiń tynyshtyǵy, birligi, tatýlyǵy ár shańyraqtyń beriktigimen qalyptasady. Osy baıqaýdyń oblystyq kezeńine qatysqan barlyq otbasyna alǵysymdy bildiremin»,-deı kele aımaq basshysy «Mereıli otbasy» ulttyq baıqaýy oblystyq kezeńinniń jeńimpazy, tarazdyq Ýmarovtar otbasyn marapattap, olarǵa 500 myń teńgeniń sertıfıkatyn tabys etti.
Úsh býynnan beri dárigerlikti úzbeı kele jatqan Ýmarovtar otbasynyń ózgeler úshin rasynda da ónegesi mol.
Olardyń jalpy dárigerlik eńbek ótili – 147 jyldan asady. Otaǵasy, marqum Muhtar Ýmaruly ómiriniń 44 jylyn densaýlyq salasyna arnaǵan eken.
Uldary Gýlam, Gavhar, Gafýr atty ul-qyzdary dárigerlik jolyn jalǵap, jemisti eńbek etýde.
Gýlam Muhtaruly oblystyq máslıhattyń depýtaty, oblystyq «Qan» ortalyǵynyń basshysy retinde qoǵamǵa belsendi úles qosýda.
Osy áýlettiń Shahnoza, Aıshahon atty nemereleri de dárigerlik mamandyqtary boıynsha joǵary bilim alýda.
Jeńimpaz atanǵan bul otbasy baıqaýdyń respýblıkalyq kezeńinde baq synamaq.
Aıta keteıik, atalǵan baıqaýdyń júldeli birinshi orynyna T.Rysqulov aýdanynan Isaevtar otbasy ıe boldy.
Atalǵan otbasy 2019 jyly «Otbasy úlgisindegi balalar úıin» ashyp, ómirlik qıyn jaǵdaıdaǵy balalardy qoldaý ortalyǵynan 6 ul-qyzdy patronattyq tárbıege alǵan.
Bul kúnde otbasynda 10 ul-qyz ósip keledi.
Al, baıqaýdyń ekinshi júldesine Jambyl aýdanynan Tazabekovter otbasy laıyq dep tanylypty.
Sondaı-aq, baıqaýdyń úshinshi júldesi merkilik Jumataevtar otbasyna buıyrdy. Bul otbasy 2006 jyldan beri 100 múgedek balaǵa qol ushyn sozǵan.
25 jasty jumyspen qamtyp, 15 adamǵa tegin dári-dármek taratqan. Elordada eki, Bishkek pen Taraz qalalarynda 5 stýdent osy otbasynyń demeýshiligimen alańsyz tegin bilim alýda.
Al jýalylyq Murataevtar otbasy «Ónerli otbasy» atalymmen marapattaldy.
Jeńimpazdar men júldegerlerge aqshalaı syılyqtarǵa ıe boldy. Shara kontserttik baǵdarlamaǵa ulasty.