«Mereıli otbasy»: elordada qalalyq kezeńge ótinimder qabyldanyp jatyr

ASTANA. QazAqparat - Astana qalasynda «Mereıli otbasy» ulttyq konkýrsynyń qalalyq týryna qatysý úshin ótinim qabyldanyp jatyr, dep habarlaıdy QazAqparat elorda ákimdiginiń resmı saıtyna silteme jasap.

Konkýrs otbasy ınstıtýty, adamgershilik, rýhanııatty nyǵaıtý, jaýapty erli-zaıyptylyqtyń mańyzyn taný; ata-analardyń bala tárbıeleýdegi jaýapkershiligin arttyrý; otbasylyq qundylyqtardy, kámeletke tolǵan balalarynyń eńbekke qabiletsiz jáne egde jastaǵy ata-analaryna qamqorlyǵyn dáripteý jáne keńinen nasıhattaý; qazaqstandyq otbasynyń jaǵymdy ımıdjin nasıhattaý baǵyttalǵan.
Konkýrsqa qatysý úshin elektrondyq nusqada myna qujattardy tapsyrý qajet:
1) ata-analardyń (qorǵanshylardyń, qamqorshylardyń) jeke basyn kýálandyratyn qujattardyń kóshirmeleri, balalardyń týý týraly kýálikteriniń kóshirmeleri;
2) asyrap alýshy (qorǵanshy) otbasylar úshin - jergilikti ýákiletti organnyń kámeletke tolmaǵan balaǵa qorǵanshylyqty (qamqorshylyqty) belgileý týraly sheshiminen úzindi kóshirme;
3) neke qııý týraly kýáliktiń kóshirmesi;
4) ata-analarynyń bireýi qaıtys bolǵan jaǵdaıda qaıtys bolý týraly kýáliktiń kóshirmesi (bar bolsa);
5) balalardy tárbıelegeni úshin madaqtaýlardyń, belgili bir jetistikteri úshin alǵan madaqtaýlardyń bar ekenin kýálandyratyn qujattardyń kóshirmeleri;
6) zańdy jáne (nemese) jeke tulǵalardyń usynym hattary (keminde ekeý);
7) otbasy músheleriniń eńbektegi, sporttaǵy, shyǵarmashylyq, zııatkerlik, ǵylymı joǵary jetistikterin kýálandyratyn qujattardyń kóshirmeleri;
8) qoǵamdyq paıdaly qyzmetke (volonterlik, qaıyrymdylyq, metsenattyq, tálimgerlik) (bar bolsa) qatysýdy rastaıtyn qujattardyń kóshirmeleri.

Qujattar toptamasy tolyq usynylmaǵan jaǵdaıda ótinim berilgen kúnnen bastap eki jumys kúni ishinde usynylǵan qujattardy konkýrsqa qatysýǵa nıet bildirgen otbasyna qaıtarady.

Konkýrsqa qatysýǵa nıet bildirgen otbasy usynylǵan qujattar qaıtarylǵan kúnnen bastap úsh jumys kúni ishinde pysyqtalǵan ótinimdi qaıta beredi.

Konkýrsqa qatysý úshin ótinimderdi qajetti qujattarmen qosa arnaıy nysan boıynsha (pdf formatynda) 15 maýsymǵa deıin [e-mail] elekrondy poshtaǵa tapsyrý qajet.
Konkýrsqa qatysý boıynsha tolyq aqparatty kelesi telefondar arqyly bilýge bolady: 8 7172 55 67 08, 8 7172 55 67 01.
Aıta keteıik, QR Prezıdentiniń 2013 jylǵy 6 jeltoqsandaǵy № 250 ókimine sáıkes Qazaqstanda jyl saıyn «Mereıli otbasy» ulttyq konkýrsy ótkiziledi