Mereıli otbasy: 91 jastaǵy tyl ardageriniń otbasy jeńiske jetti
Bul baıqaý Elbasy Nursultan Nazarbaevtyń bastamasymen 2014 jyldan beri uıymdastyrylyp keledi.
Nur-Sultan qalasy ákiminiń orynbasary Erlan Qanalımovtyń aıtýynsha, konkýrsqa qatysý týraly sáýir aıynda BAQ-ta habarlandy. Oǵan bir aı boıy ekonomıkanyń ár sektorynda jumys isteıtin 70-ke jýyq astanalyq otbasy qujat tapsyrdy. Nátıjesinde qujattary barlyq talapqa saı kelgen 43 otbasy arasynan jeńimpazdar anyqtaldy.
«Baıqaý jeńimpazdary konkýrstyq komıssııa otyrysynda ashyq daýys berý arqyly anyqtaldy. Ádil qazy quramyna qoǵam qaıratkerleri, ardagerler keńesiniń, qoǵamdyq keńestiń músheleri, JOO ǵylymı qyzmetkerleri jáne máslıhat depýtattarynan 15 adam endi. Baıqaýǵa qatysý úshin otbasy eń aldymen kóp balaly bolýy kerek. Áýlettiń túrli sala boıynsha qoǵamǵa qosqan úlesi bolýy qajet. Jáne eń bastysy - sol áýlettiń balalarynyń jetistikteri, oqý ozattary, sport, ǵylym boıynsha marapattary bolýy kerek», - dep túsindirdi ákim orynbasary.
Osylaısha, «Mereıli otbasy» Nur-Sultan qalalyq baıqaýynyń bas júldesin Qoıbaqovtar áýleti jeńip aldy jáne qyrkúıek aıynda ótetin respýblıkalyq baıqaýǵa joldama aldy. Qoıbaqovtar - Uly Otan soǵysy batyry men tyl ardageri, batyr anadan taraǵan áýlet. Áýlettiń anasy Bakıra Nysanbaıqyzy 91 jasta. Ájeı 10 baladan 32 nemere, 31 shóbere, 5 shópshek súıip otyr. Bul úıde 3 ǵylym doktory, 2 ǵylym kandıdaty, 2 zań qyzmetkeri, 3 medıtsına mamany bar. Sonymen birge, 7 adam áskerı qyzmet atqarady.
Baıqaýdyń júldeli І oryny Dúısenǵazy januıasyna berildi. Aqyn Dúıensǵazy ata men Gúlsim ájeı 8 bala tárbıelegen. Barlyǵy óleń shyǵarýmen, sýyrypsalma aqyndyǵymen tanylǵan. Solardyń biri - elimizge tanymal aqyn, aıtysker Serikzat Dúısenǵazy.
«Mereıli otbasy» qalalyq baıqaýynyń ІІ oryny eki otbasyǵa berildi. Olar - ustazdyqpen eńbegi sińgen kópbalaly Dáýeshovter januıasy jáne rýhanı tárbıeni nasıhattaýshy Máljanbaı áýleti. Júldeli ІІІ oryn da Ospanqulovtar men Qadyrbaevtar otbasyna birdeı berildi. Eki áýlette de úbirli-shúbirli 8 baladan taraǵan.
Saltanatty marapattaýdan soń jeńimpaz januıalarǵa tanymal estrada ánshileri óner kórsetti.